Valledor anuncia la proposición d’una nueva Llei d’Asturiana na Xunta Xeneral

El diputáu d’IU-BA-LV, Francisco Javier García Valledor, anunció esti vienres que’l so grupu parlamentariu va proponer na Xunta Xeneral l’actualización de la Llei d’Asturianía pa reconocer “la delda d’Asturias cola so xente del esternu”. La propoisición de Llei de Valledor quier reconocer los drechos sociales de los asturianos emigraos.

L’ex-conseyeru de Xusticia manifestó que trescurrieron “más de venti años del vixente marcu llegal” y apuntó la necesidad de que se puean “actualizar les normatives pa adaptales a les necesidaes riales y a les reivindicaciones plantegaes polos asturianos del exterior”. Tamién ye necesaria pa Valledor, “la creación de instrumentos para interrelacionar la emigración asturiana histórica cola nueva emigración, principalmente xuvenil”, faciendo alusión al xorrecimientu d’Asociaciones al estilu d’Asturianos en Madrid (ASMA) en capitales como Bruxeles o Londres.

Valledor destacó tamién la necesidá de garantizar pala emigración el Salariu Social Básicu, la cobertura residencial a los emigrantes mayores y l’accesu a la vivienda, nel casu de los retornaos. Nel casu de los emigrantes que sigan nos sos países d’acoyida, atalanta necesario sofitar programes d’ayuda económica a persones en situación d’emerxencia, cobertura sanitaria, places en residencies pa mayores y atención a les persones con discapacidaes. Cola proposición de Llei que fai IU-BA-LV crease la figura del “asturianu o asturiana d’adopción” que ye una de les “principales demandes de los centros asturianos latinoamericanos que ven na xente non asturiana de los llugares onde s’alcuentren allugaos la única oportunidá de caltener nel futuru viva la asturianía nunos territorios que ya nun reciben emigrantes”.