Valledor abre la posibilidá de refundar Izquierda Xunida-BpA-LV como partíu asturianu

Nuna entrevista concedida al periódicu Les Noticies, el diputáu d’IX-Bloque por Asturies-LV na Xunta Xeneral, miembru del Conseyu Políticu d’IX y ex Conseyeru de Xusticia y Rellaciones Esteriores comentó posibilidá de la refundación d’Izquierda Xunida d’Asturies “como partíu asturianu” y criticó’l pactu de gobiernu firmáu por esta formación col PSOE n’Asturies, por nun ser “l’adecuáu p’Asturies y pa la esquierda nesti momentu”.

Pal diputáu asturianu ye un pautu “insuficiente por cómo se xestó y pol resultáu final”. Amás Valledor añadió que dende Izquierda Xunida-Bloque por Asturies-Los Verdes “cometióse un error de base: pensar que nun había más alternativa que l’alcuerdu cola FSA”. A xuiciu del ex Conseyeru “cometióse un error de partida porque se foi a una negociación onde se diba pautar sí o sí”.

Sicasí, Francisco Javier García Valledor reconoz na mesma entrevista a Les Noticies qu’“esti alcuerdu tien aspectos en positivo que superen el del 2003 y dalgún aspectu meyor que’l que nun se llogró nel 2007. Pero, con too y con eso, nun creo que sía un alcuerdu suficiente nestos momentos”. “Tenía que se negociar con más fuerza, con más convicción, faciendo valir más lo que somos”, declaró.

Pa Valledor “Izquierda Unida, como proyectu políticu federal, ta en procesu de descomposición dificilmente reversible”. Camienta que “la esquierda alternativa, federalista, republicana, altermundista tien que refundase en tol Estáu”. Una refundación que pal políticu asturianu “nun se puede facer dende Izquierda Unida por munches razones: debilidá estrema, falta de credibilidá de munchos dirixentes…”.

Pa Valledor “dende Asturies nun podemos resolver la situación del Estáu, pero sí podemos empezar a poner les blimes pa construir el cestu. Yo creo que n’Asturies la coalición Izquierda Xunida-Bloque por Asturies-Los Verdes tien que refundase nun partíu políticu asturianu”. Un proyectu col que’l diputáu d’IX cree que pue sumase non solo a les tres organizaciones d’anguaño, “sinón a muncha xente que nun ta en nenguna d’estes tres organizaciones y podría ver compartible esti proyectu”. Concreta Valledor que “nun se trata de precindir d’un referente estatal, sinón qu’habría qu’empeñase en reconstruir tanto un referente estatal como européu. Esi ye’l camín qu’habría que recorrer y cuido que yá tamos tardando en facelo. Yo voi siguir trabayando n’IX pa qu’esta idea espoxigue”, declaró.