Valdecarzana acueye una charra sobre la lleenda de la islla de Samalandrán

by redacción asturnews | abril 7, 2017 5:58 pm

Esti vienres a les 19 hores, el Palaciu de Valdecarzana acueye una charra sobre la lleenda culta de Samalandrán. Na mesma van intervenir Víctor Raul Pintado Rey, “Vitu”, autor del llibru “Samalandrán, islla de lleendes”, xunto cola ilustradora del mesmu, Raquel Álvarez Iglesias, “Niña Rata”.

L’actividá entámala la Estaya de la Llingua del Conceyu d’Avilés y va tratar sobre la islla de Samalandrán, asitiada énte la Sablera de Samalandrán na marxe derecha de la Ría. Trátase d’una islla misteriosa que va al debalu pela mar; una islla que ye quien a xurdir, a desapaecer y tamién a  facer xurdir l’arena del fondu la mar cuando-y peta.

D’esta manera, Víctor Raúl Pintado Rey y Raquel Álvarez Iglesias, van a intentar dar rempuesta a estes y otres entrugues como:

¿Ye una lleenda culta o popular?
¿Qué teoríes esisten sobre’l topónimu?
¿D’ónde podría venir el términu Samalandrán?,
¿Cómo yera la islla?
¿Aú taba?

La entrada ye de baldre hasta enllenar aforu.

Source URL: http://asturnews.com/valdecarzana-acueye-una-charra-sobre-la-lleenda-de-la-islla-de-samalandran/