Portada Patrimoniu Uviéu y Santiago apauten potenciar el Camín Primitivu qu’amiesta dambes ciudaes

Uviéu y Santiago apauten potenciar el Camín Primitivu qu’amiesta dambes ciudaes

by redacción asturnews

Esti día’l presidente de la Fundación Municipal de Cultura d’Uviéu, Roberto Sánchez Ramos ,apurrió al alcalde de Santiago una carta del alcalde d’Uviéu, convidándolu a celebrar una xunta de dambes corporaciones na Capital asturiana.

Al mesmu tiempu, Uviéu proponía un congresu científicu que pudiera afitar les bases sobre les que se van desenvolvese les directrices a siguir pal impulsu del Camín Primitivu.

El presidente de la Fundación Municipal de Cultura d’Uviéu, Roberto Sánchez Ramos, axuntóse, na mañana d’esti martes, col alcalde de Santiago de Compostela, Martiño Noriega Sánchez, pa empecipiar contactos ente dambos gobiernos empuestos a la potenciación de la exa inicial del Camín de Santiago, conocíu como Camín Primitivu, ente les capitales gallega y asturiana. Na xunta tuvieron presentes, amás, la concejala de Cultura de Santiago, Branca Novo Neyra y el técnicu cimeru de la FMC del Conceyu d’Uviéu, el funcionariu Juan Vega Alonso.

L’alcalde de Santiago amosose en tou momentu dispuestu a collaborar de manera entusiasta na ellaboración conxunta d’un proyectu de recuperación del Camín Primitivu, qu’apocayá recibió la so declaración como Patrimoniu de la Humanidá de la UNESCO, lo qu’abrió la vía pa empecipiar estes xestiones. El conceyal uvieín recordó al rexidor de Santiago qu’Alfonso II, Rei d’Asturies, foi’l primer pelegrín del Camín de Santiago, personándose la delegación uvieina nel monumentu que la Ciudá d’Uviéu alzó en Santiago nel añu 1965 pa conmemorar esi acontecimientu de la nuesa hestoria altomedieval.

La capital gallega va xunise asina a la iniciativa que desenvuelve la Fundación Municipal de Cultura d’Uviéu, que ta preparando con profesores de la Universidá un congresu internacional llamáu a afitar les bases científiques sobre les que puede recuperase esti episodiu históricu, qu’amás de la so enorme relevancia pa la conocencia de los oríxenes de la Capital d’Asturies, ye yá tou un motor pa la crecedera del turismu cultural, que se ta faciendo notar de manera bien relevante, desque se produció la declaración de la UNESCO.

Amás de esti asuntu, na xunta alcordóse la celebración d’un alcuentru n’Uviéu ente los gobiernos de los dos capitales, empuesta al establecimientu de mecanismos conxuntos de programación d’actividaes culturales y festives, según pal intercambiu d’esperiencies nes distintes árees de xestión municipales.

 

Tamién te podria gustar