Uviéu vuelve rindir homenaxe al campu dende’l viernes 11 en L’Ascensión

La feria L’Ascensión, que va entmar esti día 11, entórnase esta edición col públicu infantil con nueva ufierta d’actividaes para neños y neñes na carpa de La Llosa y rinde homenaxe al campu como cada añu.

La cita va desenvolvese anguaño en dos fases, la primera d’ella los díes 11, 12 y 13 de mayu, nel cascu antiguu y La Llosa, y la segunda’l 19 de mayu nel Polígonu Olloniego-Tudela Veguín, como esplicó’l conceyal de Cultura y Presidente de la SOF, Roberto Sánchez Ramos, qu’anunció que la Feria cunta con un presupuestu total de 108.805 euros.

Al igual que l’añu pasáu, el cascu antiguu y Plaza Porlier van acoyer el Mercau Ástur que va tar instaláu dende’l vienres 11 al domingu 13 de mayu, nel que va poder esfrutase de degustación y vienta de productos artesanos tradicionales ellaboraos con ingredientes naturales, y el tradicional mercadín d’artesanía, amás de xuegos tradicionales y pasacalles con bandes de música tradicional asturiana.

La Llosa de Renfe va allugar un ferial con productos asturianos, quesos artesanos, y comíes típiques asturianes. Amás habrá esposiciones, mercadín tradicional, esposición d’escanda, esposición d’apicultura y puestos de dellos conceyos d’Asturies. L’apueste fuerte d’anguaño son les actividaes dedicaes a los más pequenos, con talleres infantiles dedicaos a les conocencies artesanes y xuegos tradicionales.

Van instalase dos escenarios, unu abiertu y otru zarráu, pol que van pasar más de 30 artistes de la música asturiana, bandes de gaites, teatru costumbrista, monólogos y coros provenientes de distintos conceyos asturianos. Amás Per segundu añu, a les 17 hores del sábadu va partir de la plaza de la Escandalera y va terminar na plaza de los Ferroviarios el desfile folclóricu, que va cuntar cola presencia de 17 bandes de gaites y grupos folclóricos.

Ente les novedaes de La Llosa destaca la Gala d’Estrelles cola presentación de los exemplares de races asturianes que ganaron certames nacionales. El sábadu 12 de mayu a les 19:30 hores, va tener llugar l’Homenaxe a Xuacu Amieva nel Teatru Filarmónica. A otru día, domingu 13 de mayu a les 13:00 hores va llevar a cabu l’Homenaxe Paisanu y Paisana del Añu nel Auditoriu Príncipe Felipe en collaboración cola Fundación Caxa Rural d’Asturies.

La segunda fase d’esta Feria de L’Ascensión va tener llugar el próximu sábadu 19 de mayu, nel que se va volver a celebrar el mercáu de ganáu nel polígonu de Olloniego-Tudela Veguín, aumentando l’espaciu dedicáu a la Feria Ganadera hasta los 38.000 metros cuadraos.

El programa completu pue atopase equí: http://www.oviedo.es/ascension