Uviéu va sumar a los comerciantes d’El Cristu al procesu del vieyu HUCA

Uviéu va sumar a los comerciantes d’El Cristu al procesu de participación ciudadana pa definir los usos de los terrenes del antiguu Hospital Universitariu central d’Asturies. Asina lo anunció hai poco la vicealcaldesa y responsable municipal de Participación, Ana Taboada, nuna xunta con representes de l’Asociación Vecinal y Comercial El Cristu, Monte Cerrao, Llamaquique y Buenavista.

Na mesma entrevista, a la qu’asistió’l conceyal d’Economía, Rubén Rosón, alcordóse llanzar una batería d’iniciatives pa impulsar l’actividá económica nel barriu, bien afectada pol zarru del vieyu hospital. Los vecinos comprometense a presentar propuestes de dinamización del barriu, como pue ser la realización d’actuaciones musicales, la organización de feries de comerciu, o actuaciones conxuntes de los comerciantes de la zona pa promocionar los sos negocios.

“Creemos qu’al traviés de la participación ciudadana, y col respaldu municipal, ye posible devolver l’allegría a esti barriu, que non yá sufrió la crisis económica, tamién el zarru d’un equipamientu sanitariu que yera un motor económicu. Queremos buscar fórmules por que recupere esi emburrie”, afirmó la vicealcaldesa d’Uviéu.