Uviéu va cuntar con dos nuevos institutos diseñaos como modelos de sostenibilidá ya innovación en La Florida y La Corredoria

Uviéu va cuntar con dos nuevos institutos diseñaos como modelos de sostenibilidá ya innovación en La Florida y La Corredoria
22 mayu 18:39 2017 Imprimir

Uviéu va cuntar con dos nuevos institutos diseñaos como modelos de sostenibilidá ya innovación en La Florida y La Corredoria que la conseyería d’Educación y Cultura presentó esta selmana pasada y nos que se van invertir 16,2 millones.

El conseyeru d’Educación y Cultura, Genaro Alonso, l’alcalde d’Uviéu, Wenceslao López, el conceyal d’Urbanismu, Ignacio Fernández del Pandorial, y el director xeneral de Personal Docente y Planificación Educativa presentaron esta fin de selmana pasada’l proyectu de construcción del IES La Florida y l’anteproyectu del IES La Corredoria II, dambos n’Uviéu, dos edificios diseñaos como modelos de sostenibilidá y con espacios educativos innovadores, flexibles y dinámicos. Ta previstu que les obres concluyan a finales de 2019 y 2020, respectivamente.

El IES de La Florida va cuntar con 18 aules (12 d’Educación Secundaria y 6 de Bachilleratu), talleres y unidaes comunes, pista deportiva, ximnasiu, cafetería, área d’alministración y salón d’actos.

La inversión nel centru va xubir a 7,5 millones d’euros y va ser cofinanciada nun 80% pol Fondu Européu de Desenvolvimientu Rexonal (Feder). Los espacios del institutu van entamase en redol a paquetes programáticos, qu’arrexunten usos estremaos.

L’alcalde destacó la importancia de qu’Uviéu cunte “con dos equipamientos de vanguardia educativa y la sienda absoluta collaboración ente alministraciones que presidió tol procesu. Tratase de dos equipamientos bien demandaos y resulta un prestu ver qu’el so diseñu respuende amás criterios d’innovación y sostenibilidá”, destacó’l rexidor.

Pela so parte, el IES La Corredoria II, que se va allugar nuna parcela amiesta al Colexu Públicu Carmen Ruiz Tilve, va disponer de 24 unidaes (16 d’ESO y 8 de Bachilleratu) y una pista deportiva. El presupuestu envaloráu de les obres ronda los 8,7 millones, que tamién van ser cofinanciaos nun 80% con fondos Feder.

Esti centru va ser un referente de sostenibilidá, yá que pretende xenerar  el mínimu impactu ambiental, y d’innovación educativa, con espacios más flexibles y dinámicos. L’anteproyectu prima’l confort y la calidá de les árees d’estudiu tocantes a llume y ventilación, según el fayadizu diseñu de los percorríos. Tamién se tuvo en cuenta la correcta orientación del edificiu y les sos unidaes.

Según destacó’l conseyeru, la resultancia ye “una arquitectura estricta, midida, precisa y coles mesmes risondera y suxerente, con  un xuegu de movimientu y de color nes fachaes”.

  Categories: