Portada Uncategorized Uviéu tien la Universidá Más Innovadora en Sostenibilidá del mundu

Uviéu tien la Universidá Más Innovadora en Sostenibilidá del mundu

by redacción asturnews
Foto UI Green Meetric 1 con el rector, Santiago García Granda

La Universidá d’Uviéu vieno acabante recibir esti llunes día 7 el premiu a la Universidá Más Innovadora en Sostenibilidá 2020, apurríu mientres la presentación de les resultancies del GreenMetric World University Rankings nos que la institución académica asturiana asitiose amás ente les diez meyores del Estáu.

El rector de la Universidá d’Uviéu, Santiago García Granda, recibió esta madrugada’l premiu que reconoz a la institución académica asturiana como la Universidá Más Innovadora en Sostenibilidá 2020 (Most Innovative Sustainable University). El galardón diose a conocer nuna ceremonia virtual na que se presentaron les resultancies del GreenMetric World University Rankings 2020 ellaboráu pola Universidá d’Indonesia. Na mesma ceremonia, la Universidá Complutense de Madrid, recibió’l premiu a la Meyor Nueva Universidá Participante (Best New Participating University).

Na so intervención el rector estimó l’esfuerzu de tola comunidá universitaria asturiana por alliniar los sos procesos cola Axenda 2030 y fixo estensivu’l premiu a los miembros de la comisión sectorial de Crue Sostenibilidá, órganu qu’apigura a toles universidaes españoles.

Nesta edición del GreenMetric World University Rankings aumentó la participación d’universidaes hasta algamar les 922 de 80 países. Nesta ocasión, la Universidá d’Uviéu ocupa’l puestu 145 y asítiase ente los diez meyores universidaes españoles en sostenibilidá ocupando l’octavu llugar y siendo la única del G-9 n’entrar nesta llista.

L’índiz GreenMetric, creáu en 2010, valora les polítiques de sostenibilidá ambiental de centros d’enseñanza cimera, a nivel internacional, en función de seis categoríes: eficiencia enerxética y llucha contra’l cambéu climáticu, la xestión de borrafes, los recursos hídricos, la infraestructura, el fomentu del tresporte non contaminante y l’educación ambiental.

Tamién te podria gustar