Uviéu TECH, “la to cita col futuru”, abre’l xueves nel PEC

Robótica, videoxuegos, metaverso, realidá virtual y aumentada, intelixencia artificial, drones, escaparates dinámicos, última milla, metashopping…van completar les conferencies de dalgunos de los gurúes en nueves tecnoloxíes que son la exa del Uviéu TECH, “la to cita col futuru”, qu’abre’l xueves 24 nel PEC.

El conceyal d’Economía y Tresformamientu Dixital, Javier Cuesta, presentó’l congresu tecnolóxicu Uviéu Tech, al pie de Pablo Medrano de Casual Robots. El Palaciu d’Esposiciones y congresos d’Uviéu (PEC), va acoyer esti miércoles 23 de payares, y el xueves 24 les dos xornaes d’esta cita col futuru” na capital.

Cuesta sorrayó que “ye una iniciativa del Conceyu d’Uviéu, al traviés de la conceyalía d’Economía, unes xornaes con un componente doble, per un sitiu el d’espertos que van falar de la innovación aplicada a la tecnoloxía nel sector servicios a la que se van sumar actividaes, talleres, robótica… El sector servicios, col que llevamos trabayando especialmente dende la pandemia y en materia de tresformamientu dixital, va poder conocer les necesidaes, retos y posibilidaes de negociu. Agora mesmu la tecnoloxía ye accesible pa cualquier negociu, soluciones de robótica yá son asumibles por cualesquier axente económicu” y detalló el programa:

Esti miércoles 23 Jorge Más, “va falanos d’innovación y futuru del retail y l’espertu en robótica Pablo Mendrano, va esplicar de forma amena y cercana tolo que la robótica puede faer por nós y cuál va ser l’enclín nos próximos tiempos”.

El xueves 24, Pau Almar, “espertu en moda con años d’esperiencia nel sector testil n’empreses como Mangu o Inditex; Dani Pérez, de Talentárea y Victor Juárez que van falar de marketing dixital”.

El zarru d’Uviéu Tech, va venir de la mano d’Alberto Barreiro, “gurú en nuevos enclinos nel sector de los futuristes y consideráu por Forbes como unu de 40 meyores futuristes d’España que va dar pasu al eventu de clausura de les xornaes”, aseguró Javier Cuesta pal qu’Uviéu Tech va ufiertar “Van Ser dos diasd de tecnoloxía aplicada a la vida real”.

Pablo Medrano, CEO de Casual Robots y Casual 360, estimó al Conceyu d’Uviéu “la so visión” y sorrayó la velocidá a la que va la tecnoloxía y la robótica de servicios, que ye la que s’aplica a les persones”. Asina, el públicu asistente a les xornaes va tener la oportunidá d’averase a lo dixital dende distintes prismes, al traviés de conferencies, talleres, meses redondes… Amás del propiu programa, l’espaciu va tar estremáu en delles zones onde se van esibir de forma interactiva unidaes de robótica social o colaborativa, simuladores de vuelu y descensu en kayak en realidá virtual o realidá aumentada. Otres actividaes que van tener cabida nel congresu va ser el poder guardar el vuelu d’un dron con cámara térmica incorporada o esfrutar d’una zona gaming y afayar exemplos d’innovación tecnolóxica al serviciu de la salú o la hostelería.

La zona espositiva va cuntar con una zona centrada nel comerciu que se denominó la Tienda del Futuru na que podrán esquizase los enclinos nel ámbitu del retail (probadores virtuales, escaparates proxectaos, soluciones de metashopping..) La zona de robótica va cuntar con delles unidaes de la llamada robótica social” como Heco, el primer robot terapéuticu y algamadizu desenvueltu n’España por Casual Robot que se va presentar en primicia n’Uviéu, según la primer unidá del robot Buddy (un robot desenvueltu n’Europa diseñáu para’l  cuidu nel llar y acciones educatives) o Lovot, lo último en robótica xaponesa para xestión de xeres doméstiques.

Tola información de les xornaes en https://tech.oviedoemprende.es/