Uviéu solicita ayudes pa crear una plataforma virtual sobre la fonte de Foncalada

La Xunta de Gobiernu aprobó na so cabera sesión la solicitú d’una ayuda estatal que dexe crear una plataforma virtual pa la integración, consulta y visualización de la información disponible sobre la fonte prerrománica de Foncalada.

El proyectu ellaboráu dende la Fundación Municipal de Cultura cunta col respaldu de la Dirección Xeneral de Patrimoniu del Principáu, un equipu d’espertos de distintes disciplines (arqueoloxía, xeoloxía ya informática) y los Servicios Científicu Técnicos de la Universidá d’Uviéu. L’arquiteutu José Ramón Fernández Molina sería l’encargáu de coordinar l’equipu multidisciplinar. El Conceyu va participar na convocatoria d’ayudes del Ministeriu d’Educación Cultura y Deportes pa proyectos de caltenimientu, protección y espardimientu de bienes declaraos Patrimoniu Mundial pola UNESCO.

L’importe global solicitáu pol Conceyu pal desenvolvimientu de la plataforma xube a 53.000 euros. El proyectu tien por oxetu formular estratexes d’actuación que favorezan una meyora integral de l’actual situación del monumentu. Los espertos pretenden desenvolver una ferramienta sofisticada en modelización 3D que dexe sistematizar y actualizar tola información esistente y definir asina estratexes de meyora del monumentu dende’l puntu de vista arquitectónicu, arqueolóxicu y petrolóxicu.