Uviéu robla un conveniu de promoción turística col Conceyu de Logroño

Uviéu robla un conveniu de promoción turística col Conceyu de Logroño
14 xunetu 14:27 2020 Imprimir

El Conceyu d’Uviéu vieno acabante roblar un conveniu de promoción turística col Conceyu de Logroño. El conveniu marco establez una llínea de collaboración pal intercambiu de productos turísticos pa promocionar Uviéu como destinu turísticu ente los ciudadanos de Logroño y viceversa, con una vixencia d’un añu.

La Xunta de Gobiernu celebrada’l pasáu día 9 aprobó la firma d’un Conveniu Marco de Collaboración ente los conceyos de Logroño y d’Uviéu en materia de promoción turística que tien por oxetivu potenciar los intercambios de visitantes ente dambes ciudaes.

Los principales puntos d’actuación son:

  • Promoción de la ufierta turística cruzada ente les dos ciudaes.
  • Realización d’alcuentros y talleres de trabayu con profesionales del sector turísticu y presentaciones de la ufierta turística en caúna de les ciudaes.
  • Promoción y espardimientu de la cultura del vinu, de la sidra y de la gastronomía de dambes ciudaes al traviés de la participación de les bodegues, confreríes, etc. n’acciones al traviés de tolos medios de comunicación.
  • Establecimientu d’una llínea de collaboración pal intercambiu de productos turísticos propios, xestionaos directa o indirectamente per dambes partes, en visu a promocionar el destín turísticu d’Uviéu ente los ciudadanos de Logroño y el destín Logroño ente los ciudadanos d’Uviéu.
  • Establecimientu d’una llínea de collaboración pal intercambiu de soportes publicitarios, xestionaos directa o indirectamente per dambes partes.

El conveniu suscritu va tener una vixencia d’un añu. Alfredo García Quintana, conceyal de Turismu del Conceyu d’Uviéu, quixo destacar “la importancia” d’un alcuerdu que “va ser bien positivu” pa les dos ciudaes. El conceyal señaló qu’Uviéu y Logroño “son dos destinos qu’axunten les meyores condiciones y curiosos pal intercambiu de visitantes. Dos ciudaes de similar tamañu, con una ufierta cultural, gastronómica y comercial calidable”.

Pal conceyal esti alcuerdu ye amás “bien importante” dientro de la estratexa de recuperación económica tres la pandemia y sorrayó “l’enorme esfuerzu” que ta realzando la so conceyalía pa promocionar Uviéu como destín “seguru y calidable” ente los turistes nacionales.

  Categories: