Uviéu retoma los Cuentacuentos y Bebecuentos en biblioteques

La conceyalía d’Educación retomaba los Cuentacuentos y Bebecuentos pa neños de 0 a 3 años dende’l xueves. Educación estrena una nueva programación más amplia y anovada con nuevos grupos de teatru y títeres que van ufiertar esti serviciu lúdicu pedagóxicu en diez biblioteques públiques d’Uviéu.

La conceyalía empobinada por Lourdes García presenta una nueva programación col grupu de teatru Los Pintos, que van ufiertar l’actividá “Les estaciones d’un cuentu”, Tres la puerta títeres, cola propuesta “Nubes de Cuentu” y Goli-Goli Teatru, con “Aventures de la Pirata Escarlata”.

L’actividá entamó’l xueves  a les 18:00 h na Biblioteca de Ventanielles y va enllargase mientres los meses de mayu y xunu. Les biblioteques que van acoyer los cuentacuentos van ser les de Tudela Veguín, La Granxa, Ventanielles, Trubia, Ciudá Naranco, Teatinos, Corredoria, San Cloyo, Vallobín y San Llázaro.  La conceyala d’Educación y Biblioteques, Lourdes García, señalaba que por fin s’arreglaron los problemes alministrativos que detectáramos na contratación d’esti programa y podemos retomar esta actividá, a la que quixímos dar nuevos aires, con una programación nueva y nuevos grupos de teatru y títeres”, señalaba Lourdes García.