Uviéu quier presidir en 2018 l’alcuentru de la Rede de Ciudaes Amigues de la Infancia de Unicef

Uviéu quier presidir en 2018 l’alcuentru de la Rede de Ciudaes Amigues de la Infancia de Unicef
03 febreru 17:28 2017 Imprimir

El Conceyu d’Uviéu, aspira a presidir en 2018 la xunta biañal de la Rede de Ciudaes Amigues de la Infancia, de la que forma parte dende’l pasáu añu, y del alcuentru de los grupos de participación integraos polos neños.

Asina-y lo treslladó la conceyala d’Atención a les Persones ya Igualdá, Marisa  Ponga, al presidente de Unicef n’España, Carmelo Angulo Barturen, demientres la xunta de trabayu que caltuvieronal entamu la selmana y a la que tamién asistió la presidenta de Unicef Asturies, María José Plateru. Tres l’alcuentru, fueron recibíos pol alcalde d’Uviéu, Wencesalo López.

El presidente de Unicef señaló que’l Comité España de Unicef va considerar seriamente” la candidatura d’Uviéu pa ser see, en 2018, de la xunta que la organización celebra cada dos años. Coles mesmes, allabó la respuesta en cooperación del Principáu d’Asturies y especialmente les subvenciones recibíes per parte del Conceyu d’Uviéu y la sensibilidá del Consistoriu colos menores “les escucha y déxa-yos participar”.

La ciudá d’Uviéu recibió’l sellu que l’acredita como Ciudá Amiga de la Infancia (CAI) de Unicef el pasáu 16 de Payares en Santander. Una Ciudá Amiga de la Infancia (CAI) ye aquella qu’impulsa y promueve l’aplicación de la Convención sobre los Derechos del Neñu nel ámbitu local, promociona la participación de los neños, neñes y adolescentes en toos les temes que los afecten, y fomenta el trabayu en rede ente los distintos conceyos que formen parte d’esta iniciativa. N’España son 170 les poblaciones que conformen la rede de Ciudaes Amigues de la Infancia.

L’aprobación hai poco del I Plan Municipal d’Infancia y Adolescencia, el PIOVI 2016-2019, foi l’impulsu definitivu pa llograr esti sellu.

 

  Categories: