Uviéu programa más de 80 actividaes culturales nel so Festival de branu 2016

Uviéu programa más de 80 actividaes culturales nel so Festival de branu 2016
03 xunetu 12:20 2016 Imprimir

El Conceyu d’Uviéu, al traviés de la Fundación Municipal de Cultura, tien programaes pa esti branu más de 80 actividaes culturales, englobaes nel Festival de Branu 2016. Conciertos nel Muséu Arqueolóxicu, “Cine a la lluz de la lluna”, esposiciones, danza o jazz internacional constitúin dalgunes de les cites branices na capital.

De xunetu a setiembre va haber más de 80, munches d’elles con entrada llibre. El conceyal de Cultura, Roberto Sánchez Ramos, y el Director artísticu del Festival, Cosme Marina presentaben la selmana  pasada en rueda de prensa agradeciendo “a tolos trabayadores de l’área l’esfuerzu que fixeron con esta programación” de la que destacó “nuevos allugamientos que van llevar munches de les actividaes a zones del conceyu y a barrios”.

Asina, los conciertos van desenvolvese nel Muséu Arqueolóxicu, l’Auditoriu, nel claustru del edificiu históricu de la Universidá d’Uviéu, el Paséu del Bombé, Santa María La Real de la Corte, el Teatru Casín de Trubia y nos centros sociales de Cualloto y San Cloyo, averando en munchos casos la música a los barrios. A xuiciu de Cosme Marina “nun esiste n’Asturies una iniciativa cultural na que se de tanta importancia a los artistes asturianos dende un puntu de vista tresversal y con tantes cañes artístiques”.

El Festival de Branu, nel apartáu d’Artes Escéniques, va incluyir,  nel Teatru Campoamor, los díes 5 y 6 d’agostu, la representación de “Los vecinos de riba” y na Filarmónica, del 11 al 10 de setiembre’l X Festival Nacional de Teatru Amateur, con casi una ventena de compañíes y representaciones.

El cine tampoco va faltar na temporada cultural d’esti branu. El Teatru Filarmónica va acoyer, del 4 al 25 de xunetu, delles proyecciones englobaes nel ciclu “Uviéu, el color d’una ciudá cinematográfica”, con entrada llibre. Amás, la Fundación Municipal de Cultura programó’l ciclu “Cine a la lluz de la lluna”, proyecciones en delles places de la ciudá, los díes 6, 13, 20 y 27 del mes de xunetu. Esti xéneru tamién se va incluyir na programación d’agostu con un nuevu ciclu, “Al otru llau del Atlánticu”, que se va desenvolver nel Teatru Filarmónica, los díes 1, 8, 15, 22 y 29 d’agostu. Y de nuevu, con “Cine a la lluz de la lluna” va haber proyecciones nes places de la ciudá, los díes 3, 10, 17 y 24 d’agostu.

El Festival de Branu completase con Danza y con un ambiciosu ciclu de jazz que va traer a la ciudá, los díes 21 y 22 de xunetu, en concretu al Teatru Campoamor, a Kyle Eastwood y el so quintetu y, a otru día, a Jorge Pardo ya Isaac Turienzo.

L’Aula Magna de la Universidá d’Uviéu va acoyer tamién, del 13 al 16 de xunetu, el Simposii “Los Reis d’Asturies y los oríxenes de cultu a la tumba del apóstol Santiago”.

  Categories: