Portada Cooperación Uviéu presenta’l III Plan Municipal d’Igualdá ente homes y muyeres

Uviéu presenta’l III Plan Municipal d’Igualdá ente homes y muyeres

by redacción asturnews

Uviéu presenta’l III Plan Municipal d’Igualdá ente homes y muyeres, que foi alcordáu por unanimidá del Conseyu d’Igualdá y nel que se contemplen les desigualdaes ente muyeres y homes, identificaes con anterioridá.

La conceyala d’Atención a les Persones ya Igualdá, Marisa Ponga y Gloria García Nieto, del Conseyu Municipal d’Igualdá presentaron esta selmana, en rueda de prensa, l’III Plan d’Igualdá del conceyu d’Uviéu. Acompañaes de munches de les muyeres d’esti organismu, dambes desglosadron les midíes qu’engrosen el Plan, aprobáu ayeri por unanimidá nel Conseyu.

Ponga, visiblemente emocionada, recordó al entamu de la so intervención a la moza Laura Luengu, “asesinada por una bisarma, una víctima más de la violencia machista”. Y destacó “el consensu del movimientu feminista, dende la pluralidá, y el fechu de qu’a pesar de les diferencies de perspectiva algamáramos esti consensu, que deamos asina exemplu como muyeres. Esto pue ser un mensaxe pa una sociedá qu’en munchos casos sigue dirixida por homes”. La conceyala tamién estimó a “tolos grupos políticos y a tolos que trabayaron nesti Plan por avanzar en propuestes que faigan a Uviéu xuna ciudá llibre de violencies machistes. La principal característica pos, ye la participación de les muyeres. Esti tercer plan tienen xuna vixencia hasta 2020, curtia porque queremos que sía daqué que non nos encorsete”.

Gloria García Nieto destacó que nel Conseyu aprobóse esti Plan per unanimidá “porque si siguimos aldericando podíamos eternizanos y lo que fai falta ye qu’empiece yá a concretase.  Foi un trabayu importante de participación. Esperemos qu’Uviéu sía xuna ciudá de tolerancia machista cero, nel que les muyeres tengamos les mesmes opciones y servicios y quiciabes podemos pidilu una casa d’alcuentros al nuevu añu, porque creo que sería un elementu simbólicu pa evaluar y aldericar esi Plan”.

La conceyala d’Atención a les Persones aseguró que son 127 midíes, n’ocho exes. “Esperemos qu’Uviéu tenga llueu esi espaciu, una casa d’alcuentros”. Ponga tamién destacó l’alcuerdu alcanzáu pol conceyal de Personal, Iván Álvarez, “con representantes empresariales y sindicales pa reforzar les clausulas sociales qu’incorporen la perspectiva de xéneru por que más muyeres puedan aportar al empléu, ameyorar la conciliación con preseos públicos, coeducación y corresponsabilidad”.

Descargar el Plan íntegru.

Tamién te podria gustar