Uviéu presenta ‘Préstate esti branu’ pa faer posible la conciliación familiar

Uviéu presenta ‘Préstate esti branu’ pa faer posible la conciliación familiar
15 xunu 08:53 2020 Imprimir

Uviéu presenta ‘Préstate esti branu’ pa faer posible la conciliación familiar en nueve centros d’Uviéu, con actividaes empobinaes a neños d’ente 6 y 12 años qu’esti branu van tar suxetes a les midíes de seguridá sanitaria y de distanciamientu social.

La conceyalía de Centros Sociales presenta’l programa de talleres infantiles Préstate esti branu que se va a desenvolver nos meses de xunetu, agostu y setiembre, y que va a englobar actividaes empobinaes a menores d’ente 6 y 12 años que van celebrase nun total de nueve centros sociales d’Uviéu. Dende esta conceyalía, Lourdes García señaló güei que se fixo un esfuerzu especial pa poder celebrar estes actividaes afaciéndonos a les nueves circunstancies y respetando les midíes de seguridá sanitaria que tenemos de caltener. Préstate esti branu ye una de les apuestes pola conciliación familiar que tan necesaria fse fai tres estos meses de confinamientu colos neños en casa. Con esti programa, los más pequenos van aprender esfrutando y los sos padres poder trabayar sabiendo que los sos fíos tán bien atendíos”, señaló la concejala.

Préstate esti branu inclúi: actividaes y talleres de ximnasia , bailoterapia, sofitu escolar, xuegos d’esterior, yoga, cuentacuentos, xuegos de lóxica, esperimentos científicos y manualidades. Un programa que sigue dinamizando la rede de centros sociales del conceyu con actividaes pa tolos públicos y pa toles edaes. Nestos talleres, monitores especializaos van dar recursos bien positivos a los neños, como ameyora de l’autoestima, amor pola llectura, vencer la cobardura, fomentar la socialización y la so autonomía, ente otres habilidaes.

Tocantes a la organización de los grupos d’usuarios, van  entamar por quincenes, con un calendariu estructuráu en cinco quincenes, pa una participación envalorada d’unos 1000 chavales en tol branu, con grupos d’unos 10 neños al empar por actividá. Les instalaciones nes que se va impartir son: Ciudá Naranco, el Cortixu na Corrredoria, Cualloto, El Cristu II, el centru de l’Argañosa,  Oteru, Pumarín, Trubia y Vallobín. El plazu d’inscripción abre’l próximu llunes 15, hasta’l 25 de xunu. Les places van axudicar por sortéu, y cada usuariu puede apuntase a un máximu de dos tramos quincenales. Les llistes definitiva van  publicar ente’l 1-2 de xunetu y los primeros talleres van empezar el 6 de xunetu, hasta’l 11 de setiembre.