Uviéu presenta la so estratexa de desenvolvimientu col horizonte del 2025

01 abril 09:36 2017 Imprimir

Uviéu cuntará per primer vegada con un documentu qu’afita les pautes del desenvolvimientu integral de conceyu nel mediu plazum la estratexa Uviéu 2025 ellaborada nos últimos meses.

Esti proyeutu estratéxicu cuntó cola participación d’organizaciones sociales, axentes económicos, movimientu vecinal, espertos de la Universidá d’Uviéu, profesionales de distintes disciplines y representantes d’otres alministraciones públicos.

L’alcalde, Wenceslao López, foi l’encargáu de presentar esta selmana en sociedá les conclusiones del documentu qu’apuesta por impulsar la riqueza intelixente y el emprendimiento, diseñar una ciudá más compacta y sostenible y desenvolver una gobernanza más tresparente y participativa sofitada na modernización tecnolóxica. L’alcalde empecipió la so intervención estimando’l trabayu realizáu por tolos que quixeron participar nesti documentu que se foi construyendo a lo llargo de too un añu”, lo que supunxo “poner n’escena otra forma de gobernar: faelo cola ciudadanía”.  López remarcó que “si planiamos el futuru de la nuesa familia paez obviu que tamién lo faiga un Conceyu”.

Primeramente al alcalde tomaron la palabra los voceros de los grupos municipales del gobiernu local. Per parte de SOMOS, Ana Taboada, sorrayó la importancia de qu’esta estratexa contemple una ciudá integradora, con más cultura, responsable y consciente. La vocera del PSOE, Ana Rivas, resaltó qu’esti plan estratéxicu realizáu “por y pa nós” nun ye daqué estáticu, sinón “dinámicu, porque se va deber afaer a cualquier cambéu, económicu o social”. Y pela so parte, el voceru d’IX, Iván Álvarez, dio por cumplida “la primer parte d’esti retu” y garantizó a la ciudadanía que les propuestes contemplaes nesti documentu “nun se van quedar en papel moyáu”.

Col lema Uviéu Suma+ la estratexa Uviéu 2025 pretende construyir un conceyu que reflexe les mires y pruyimientos que la ciudadanía tien pal conceyu. El documentu plantega diseñar un espaciu que priorice un proyectu de vida pa les persones, con un desenvolvimientu urbanu sostenible, humanizáu y socialmente equilibráu.  Una ciudá abierta, accesible, moderna, curiosa, amigable, comprometida coles persones, cola cultura y el mediu ambiente; asitiada nes enerxíes de la conocencia, la investigación y l’innovación, básiques pa crear riqueza intelixente. Uviéu tien d’asitiase como un referente de democracia ya igualdá reforzando la so capitalidad de forma colaborativa p’adquirir un mayor protagonismu de la Ciudá Ástur nel esterior.

La estratexa ellaboróse en redol a trés grandes exes nos que se detallen llínees d’actuación y propuestes d’acciones concretes. El primeru d’ellos sería’l d’Economía y Empléu nel que se plantegen, ente otres cuestiones, un apueste pola industria tecnolóxica y l’innovación poniendo’l focu sobre la biotecnoloxía, el fomentu de l’actividá entamadora y una llombarada significativa al sector turísticu como xenerador de riqueza.  La Sostenibilidá y Mediu Ambiente centren el segundu gran bloque d’actuaciones que, con una visión integradora, asitien a Uviéu como referente na creación de la gran área metropolitana d’Asturies pa liderar l’establecimientu de mecanismos estables de collaboración ente conceyos. Y pa finar, la última exa estratéxica allúgase na Calidá de vida, Ciudadanía y Gobernanza y nél plantégase reforzar la tresparencia de l’alministración y la participación ciudadana con un importante apueste pola modernización tecnolóxica. L’accesibilidá, y l’impulsu a los servicios de proximidá y les polítiques de vivienda y el fomentu de la cultura con una dimensión social y tamién industrial son dalgunes de les propuestes nesti apartáu.

Documentu íntegru de la Estratexa Uviéu 2025 

  Categories: