Uviéu presenta Escena Moza, el primer Festival d’artes diverses accesible

El presidente de la Fundación Municipal Cultura, el conceyal Roberto Sánchez Ramos, presentó esta selmana pasada’l I Festival d’artes diverses accesible, Escena Moza, estremáu en cinco escenes: urbana, poética, tropical, acróbata y ensin llendes.

Cada escena compondrase d’actuaciones que se van desenvolver en distintos espacios de la ciudá y de talleres que van impartir les persones qu’actúen. El conceyal tuvo acompañáu pola presidenta del Conseyu de la Mocedá d´Uviéu (CMU), Carlota Fernández- Cid y Biko Sanchís, presentadora del Festival. “Ye un prestu presentar esta actividá polo qu’hai detrás, la xente, la ilusión, esi enfotu d’enseñar coses nueves qu’asitia Uviéu a la vanguardia. va celebrar en payares y dende la Fundación Municipal de Cultura vamos siguir impulsando estes actividaes”, aseguró Sánchez Ramos.

“Dende’l CMU tamos entusiasmaos y estimamos el llabor de la Fundación. El festival ta encontáu na accesibilidá, la educación popular y la diversidá artística. Tres los seis años de ‘Cine con cocu’, que tantu ésitu tuvo, decidimos embarcamos nesti Festival d’artes escéniques, con actuaciones que non solo fueren nel escenariu sinón tamién con acciones formatives como los talleres. Asina nació Escena Moza. Como l’arte ye inclusivu y diversu, decidimos empezar perhí, con programaciones abiertes a toles disciplines y accesibles para toles persones. Reivindicamos un pequenu esfuerzu más por que esto sía posible y siguir avanzáu nesti sentíu”, sorrayó la presidenta del CMU. Y destacó que’l Festival va ser “ensin barreres arquitectóniques y con intérprete de llingua de signos”.

Biko Sanchís desenvolvió los talleres que se van impartir, nel Hotel d’asociaciones de Santullano, a otru día de cada escena que conforma’l Festival. “Hai de iniciación al rap, de micropoesía, acrobacies colectives y bailles dende la diversidá… tratar de que los artistes compartan y nós con ellos”. Tolos talleres tienen places llindaes y yá ta abiertu’l plazu d’inscripción.Nesti enllaz que vien darréu axúntase’l programa completu.