Portada Conceyos Uviéu pon en marcha’l plan pa potenciar los Meandros del Nora

Uviéu pon en marcha’l plan pa potenciar los Meandros del Nora

by redacción asturnews

El Conceyu d’Uviéu vieno acabante poner en marcha’l plan pa potenciar los Meandros del Nora, una iniciativa de la Conceyalía d’Urbanismu que dirixe Ignacio Fernández del Pando, que toma vuelu tres la firma d’un conveniu col vecín Conceyu de Les Regueres pal entamu de los trabayos. Los meandros son frontera natural ente dambos conceyos.

El Conceyu de Les Regueres, presidíu por María Isabel Méndez Ramos, aprobó en Xunta de Gobiernu sumase a la iniciativa impulsada pol Conceyu d’Uviéu pala recuperación y potenciación d’esti espaciu natural. Autorícense asina los trabayos pa percanciar información nel conceyu reguerano, tal que solicitara nuna visita recién a Les Regueres Fernández del Pandorial. Nesti alcuentru’l conceyal uvieín solicitó a la rexidora reguerana la so collaboración pa impulsar esti proyectu, que busca la puesta en valor de los meandros del Nora y la so redolada.

Los dos conceyos empecipien asina un proyectu de collaboración que va potenciar dende’l puntu de vista turísticu, medioambiental y cultural los meandros del ríu Nora, Llugar d’Interés Comuñal (LIC) y que va conectar dambos conceyos al traviés de siendes. Va Ser el Conceyu d’Uviéu l’encargáu de financiar esti proyectu que va suponer un costu inicial de 18.000 euros, y que taba por cuenta del vistu bonu del conceyu de Les Regueres qu’agora dio lluz verde al proyectu.

Amás de les siendes nes que se va asitiar información pa los visitantes, propónense tamién otres idegues, como recuperar vieyes cais esistentes na zona pero que tán en desusu y la señalización de los elementos de l’arquitectura militar de la Guerra Civil allugaos na redolada del ríu Nora, tal que esplicó Ignacio Fernández del Pando. “Los meandros del Nora suponen un elementu natural de gran valor, qu’a pesar de la so proximidá a la nuesa ciudá resulten pa munchos totalmente desconocíos. Con esti proyectu pretendemos potenciar tol so valor y espublizar la conocencia d’esti espaciu, curiando y respetando siempres la redolada natural. L’estudiu qu’agora empieza va marcanos los pasos a siguir. Nós solos nun teníamos la capacidá de desenvolver un proyectu asina, polo que tamos encantaos y estimosos de la collaboración del Conceyu de Les Regueres. Uviéu dexó de ser xuna isla y los llazos d’unión cola vecindá son cada vez más sólidos”, matizó Fernández del Pando na presentación.

Tamién te podria gustar