Uviéu pon en marcha’l grupu de trabayu municipal que va revisar la normativa municipal

Uviéu pon en marcha’l grupu de trabayu municipal que va revisar la normativa municipal
29 ochobre 13:25 2019 Imprimir

L’equipu de gobiernu del conceyu d’Uviéu pon en marcha’l grupu de trabayu municipal que va revisar y va actualizar la normativa municipal obsoleta.

L’equipu de gobiernu asistió a la fin de la selmana pasada a la primer xunta d’un grupu de trabayu para revisar tola normativa municipal. A esta xunta asistieron tolos conceyales de gobiernu xuntu colos sos xefes de serviciu correspondientes.

L’oxetivu d’esti grupu de trabayu municipal ye afaer la normativa municipal, ordenances, reglamentos y bandos, a l’actualidá y a los cambeos que se produxeren n’otres normes autonómiques, estatales o europees. Cuesta señaló que se constitúi esti grupu de trabayu, que va tener un papel perimportante na creación d’actividá económica y puestos  de trabayu, conjuntamente col restu de miembros del equipu de gobiernu y que l’oxetivu ye que nun s’eternice nel tiempu y vaya a funcionar de manera executiva y abondo axilosa por que les resultancies puedan vese llueu. El grupu de trabayu presidíu pol conceyal d’Infraestructures va axuntase dientro de trés selmanes dempués d’arrexuntar entre tolos servicios les necesidaes de revisión de la normativa municipal no qu’afecte a les sos árees.

Según esplicó’l teniente d’alcalde, Ignacio Cuesta, “esti grupu de trabayu que güei se pon en marcha va ser fundamental pa xenerar más actividá económica y, por tanto, empléu. Hai asuntos ensin regular, como por casu  la movilidá eléctrica, qu’inclúi l’usu de patinetes que va haber  que regular al traviés d’una ordenanza que nun esiste a día de güei, por cuenta de que se ponga en marcha la normativa estatal”.

El conceyal esplicó amás que se va encetar la necesidá d’establecer una zonificación d’ordenances, que nun haya normativa xeneralista que regule tola ciudá por igual como asocede agora. Tamién anunció que, al marxe de los periodos d’información que marca la llei, van  caltenese xuntes para consensuar estos cambeos con axentes implicaos, como vecinos, hosteleros o comerciantes a los  que pueda afectar.

  Categories: