Uviéu pon en marcha seis programes de formación y emplegu

by redacción asturnews | marzo 9, 2018 10:13 am

Al traviés del proyectu “Actívate[1]” el conceyu d’Uviéu pon en marcha seis programes de formación y emplegu pa paraos de llarga duración col que va contratar a 48 persones mayores de 45 años que van recibir tamién orientación profesional pa reinsertarse dempués al mercáu llaboral.

La Conceyalía d’Economía del Conceyu d’Uviéu va poner en marcha seis nuevos programes de formación y empléu dientro del plan “Actívate” pa favorecer la reinserción llaboral de los paraos de llarga duración del conceyu. Los proyectos, que fueron aprobaos güei pola Xunta de Gobiernu, van sirvir pa realizar 48 contratos de media xornada y seis meses de duración a persones de más de 45 años. Los participantes, amás, van compaxinar el trabayu y les clases.

Los nuevos cursos del “Actívate” suponen la contratación d’otres nueve persones, que se van encargar d’emponer tantu los trabayos sobro’l terrén como les sesiones formatives. En concretu, tratase de seis monitores y trés mentores. Los participantes van recibir certificaos de profesionalidá n’actividaes auxiliares d’almacén, operaciones auxiliares de revestimientos continuos en construcción, operaciones de fontanería y calefacción climatización doméstica, dinamización d’actividaes de tiempu llibre educativu infantil y xuvenil, arreglos y adaptaciones de prendes, y artículos de testil y piel y llimpieza de superficies y moblame n’edificios y locales.

Al rematar los seis meses que van tener de duración los contratos, los y les trabayadores participantes van tener asesoramientu llaboral mientres l’añu siguiente. Un complementu qu’escuerre favorecer la so incorporación al mercáu llaboral una vegada adquirieron les conocencies y esperiencies qu’apurren los programes del plan “Actívate” y que queden reflexaos cola entrega d’un certificáu de profesionalidá.

Endnotes:
  1. Actívate: http://%20http://www.oviedo.es/programactivate

Source URL: http://asturnews.com/uvieu-pon-en-marcha-seis-programes-de-formacion-y-emplegu/