Portada Conceyos Uviéu pon a la vienta les entraes sueltes para les Xornaes de Pianu

Uviéu pon a la vienta les entraes sueltes para les Xornaes de Pianu

by redacción asturnews

La Fundación Municipal de Cultura va poner a la vienta a partir d’esti llunes 18 les localidaes sueltes pa los Conciertos del Auditoriu y les Xornaes de Pianu Luis G. Iberni, hasta avientu. Una vegada rematada la vienta d’abonos pa dambos ciclos, ponense a la vienta estes localidaes con precios que bazcuyen ente los 10 y los 28 euros, pelos medios habituales y yá ensin restricciones de nengún tipu tres la escayencia de les midíes sanitaries autonómiques.

El presidente de la Fundación Municipal de Cultura,  José Luis Costillas, “celebra que podamos retomar por fin estos dos ciclos colos aforos completos. Uviéu va volver a esfrutar de la música clásica en tou la so rellumanza, con grandes figures internacionales y sorpreses como jovencísimos intérpretes. Xuna temporada de clásica que se va sumar a la nutrida ufierta que preparemos nesta seronda cultural uvieina”, señala’l conceyal.

Dende Cultura recuerden que’l ciclu de seronda, yá recuperáu l’aforu completu del Auditoriu, va ufiertar siete conciertos, siendo’l primeru d’ellos el sábadu 23 d’ochobre col trompetista Pacho Flores y Uviéu Filarmonía, so la dirección de Lucas Macías. Flores, que ta consideráu como’l meyor trompetista del mundu, va ufiertar dos estrenos absolutos na nuesa ciudá. El primeru d’ellos, el del uvieín Guillermo Martínez, que forma parte del Proyectu Beethoven”, y el segundu, el del compositor arxentín, Daniel Freiberg, tituláu “Hestoria de tangos y flores”, un encargu de la orquesta uvieina en collaboración con otres de Noruega, Estaos Xuníos y México.

El segundu conciertu del ciclu va traer a Uviéu a otru de los grandes nomes del circuitu internacional, el percusionista Martin Grubinger, que sustitúi al primeramente previstu de C. Tezlaff, que tuvo qu’aplazar el so pasu pela ciudá. Grubinger va interpretar la obra “Conjurer”. Conciertu pa percusión y orquesta” de John Corigliano, nun programa que se completa cola Sinfonía númberu 8” d’A. Dvorak y el “Danzón númberu 2” d’Arturo Márquez. Nel conciertu va faer el so debú la directora mexicana Calandria de la Parra.

El terceru de los conciertos va ser el 14 d’avientu al cargu de la agrupación sinfónicu coral Gabrieli Consort&Players, so la dirección de Paul McCreesh, con un programa monográficu dedicáu a les Cantates de Navidá de J. S. Bach.

Les Xornaes de Pianu “Luis G. Iberni” cumplen esta temporada 30 años y van arrincar el 28 d’ochobre cola presentación del pianista francés David Kadouch acompañáu pol Cuartetu Quiroga, con un programa qu’inclúi obres de Chopin, Clara Schumann, Alberto Ginastera y Robert Schumann. La segunda propuesta cuerre a cargu del pianista austriacu Rudolf Buchbinder, con un repertoriu qu’inclúi les Variaciones Diabelli” de Beethoven que se complementa colos cambeos que se fixeron sobro la obra orixinal y l’encargu a compositores actuales.

Uviéu Filarmonía y Lucas Macías tamién se xunen a les Xornaes de Pianu, col “Conciertu pa pianu y orquesta número 2” de Chopin, interpretáu pola que ye, a les sos 13 años, la revelación del pianu a nivel internacional, la pianista rusa Alexandra Dovgan. El programa va cerrar el Proyectu Beethoven” col estrenu d’una obra del uvieín Gabriel Ordás y tamién se va interpretar la Sinfonía númberu 3” de R. Schumann.

La postrera propuesta pianística de la seronda va ser la del británicu Benjamin Grosvenor. Unu de los más demandaos nestos momentos y que torna a Uviéu con un espectacular programa centráu nel pianu románticu con obres de Brahms, Chopin y Liszt, ente elles la célebre “Sonata pa pianu en si menor.

Tamién te podria gustar