Uviéu llicita la contratación de la Tarxeta Ciudadana por 125.000 euros

Uviéu llicita la contratación de la Tarxeta Ciudadana por 125.000 euros
04 avientu 12:58 2018 Imprimir

Uviéu vieno acabante llicitar la contratación del serviciu de la Tarxeta Ciudadana por 125.000 euros. El proyectu va tener un suministru inicial de 7.500 cédules que podrán utilizase n’instalaciones deportives, teatros, biblioteques y el Cibercentru de La Lila.

La iniciativa del Gobiernu Municipal, lliderada pol Alcalde, Wenceslao López, dende la área de Modernización va tener un plazu d’execución de 18 meses. La Xunta de Gobiernu del Conceyu d’Uviéu aprobó los pliegos técnicos y alministrativos para la contratación del serviciu d’implantación y caltenimientu del proyectu piloto de la Tarxeta Ciudadana, con un presupuestu máximu de 124.630 euros y un plazu d’execución de 18 meses. Esti proyectu del Gobiernu Municipal, llideráu pol alcalde, Wenceslao López, dende’l departamentu de Modernización, preve suministrar primeramente 7.500 cédules –amás del desenvolvimientu d’una app- que podrán utilizase n’instalaciones deportives, teatros y Auditoriu, biblioteques y el Cibercentro de La Lila para realizar xestiones como les d’identificación y pagos.

El Consistoriu uvieín pretende dotar a los ciudadanos d’una ferramienta útil, que facilite la so interacción colos distintos servicios municipales. El proyectu, nel que Modernización lleva trabayando más de dos años, xira en redol al conceutu de tarxeta ciudadana”, tantu física como virtual, y tien como oxetivu disponer d’un preséu qu’identifique al ciudadanu énte cualquier serviciu, equipamientu o trámite, y con plena compatibilidá pa la posible incorporación futura de firma electrónica.

D’esta manera, va acometese una primer fase cola que pretende construyise les pilastres fundamentales sobro los que se va basar el sistema xeneral futuru, definiendo’l so funcionalidad operativa y realizando la integración de los servicios de forma que puedan valorase tolos aspeutos necesarios pa un posterior esplegue global.

Los uvieinos van poder realizar distintes xestiones municipales rellacionaes con distintes árees, ente les que destaquen la deportiva y la cultural. La sección de Deportes tien prevista l’alquisición d’un software de xestión de les sos instalaciones col que la tarxeta va ser compatible. Col so usu va entainase una parte importante de l’actividá d’estos allugamientos como pue ser la identificación, inscripción, reserves y arriendos o control d’accesos.

Nos aspeutos culturales va centrase, principalmente, na vienta de localidaes y el préstamu de llibros. La Fundación Municipal de Cultura dispón d’un sistema d’alquisición online d’entraes y abonos pa los sos eventos basáu nos pagos por aciu tarxeta de creitu, col que la nueva propuesta tendrá d’operar. Pela so parte, la rede de Biblioteques Municipales utiliza anguaño AbsysNet pa la identificación d’usuariu y tán xuntaes al serviciu eBiblio pal préstamu de llibros electrónicos, siendo la nueva ferramienta una llave de dambes funcionalidades.

A lo último, nel Cibercentru de La Lila, rique la instalación d’una rede wifi que va ser ameyorada al traviés d’un serviciu xestionáu, la tarxeta tendrá de sirvir como medio d’identificación y pal accesu a los servicios que s’ufierten al traviés d’ella.

  Categories: