Uviéu llanza la campaña #YocomproenOviedo pa incentivar y premiar el comerciu de proximidá

Uviéu llanza la campaña #YocomproenOviedo pa incentivar y premiar el comerciu de proximidá
27 ochobre 08:45 2020 Imprimir

El conceyal d’Economía y Comerciu, Javier Cuesta presentó esti día la campaña de sofitu al comerciu #YocomproenOviedo. El conceyal, que tuvo acompañáu de representantes de la Federación Asturiana de Comerciu, la Cámara de Comerciu, Adaco y Uviéu Comerciu esplicó que “güei mesmu empieza la campaña d’incentivos a la compra, una iniciativa propuesta por el mesmu sector va tiempu y a la que s’han adscritu, hasta’l momentu 500 comercios, magar decidimos nun cerrar el plazu”.

A xuiciu de Cuesta, “con esta campaña queremos treslladar que comerciu de cercanía ye la meyor alternativa y premialo, faer protagonista al comerciu de proximidá, un sector de profesionales trabayadores que se dediquen en llargues xornaes y festivos a dar serviciu y que tán arreyaos”.

El responsable municipal d’Economía aseguró que “el comerciu ye una de les bases del empléu y de l’actividá económica. Ensin comerciu nun hai vida na cai. Dende’l Conceyu vamos poder tolos medios a nuesa algame por que’l sector siéntase importante”. Con un costu de 100.000 euros, “con esta campaña consiguimos llegara un  bon númberu d’establecimientos y al comerciu de los barrios”. La campaña, argumentó’l conceyal, tien dos partes: “La del espardimientu y promoción empobinada a treslladar la imaxe de qu’el nuesu comerciu ta esperándonos y, per otra parte, sorteos basaos na entrega d’unes papeletes dixitales que’l veceru adquier cuando merca nun comerciu xuntáu y que depués van dar llugar a un sortéu de 300 cheques de 100 euros cada unu y regalos de índole tecnolóxica. Los cheques van consumir n’el mesmu establecimientu nel que s’apurrió”. La campaña va allargar hasta los primeros día d’avientu “por que los premios puedan trocase hasta’l 31 d’avientu.”

El conceyal d’Economía esplicó qu’anguaño n’Uviéu hai 1.400 llicencies d’actividá comercial y 1.000 locales inscritos. “A fecha de güei nun se ta rexistrando un impactu significativu de la pandemia tocantes a zarros de negocios nin en términos de distribución del texíu empresarial”, sorrayó.

Carmen de la Uz, vicepresidenta de la Cámara de Comerciu, amosóse “bien arguyosa por poder amosar nuesu’l sofitu a una iniciativa como esta, con un fin que nos lleve escontra alantre. El sector ta aguantándose pero creo que ye xuna oportunidá bien importante, el dar vida a la cai”.

La representante de la Federación Asturiana de Comerciu, Madalena Bonu, sorrayó que “según un estudiu recién, nos postreros cinco años perdiéronse’l 31% de los comercios na ciudá, un 30% nel conxuntu d’Asturies”.

Nacho del Río, representante de l’Asociación de Comerciu d’Uviéu, amosóse confiáu en que “les midíes puestes en marcha hasta agora sirvan por que nun vaiga a más” l’agravamientu de la situación sanitaria.

  Categories: