Uviéu, Llangreu y Mieres ponen el focu sobre’l so patrimoniu industrial

Les I Xornaes de Patrimoniu Industrial, entamaes polos trés conceyos en collaboración cola Universidá d’Uviéu, proponen un ampliu programa d’actividaes que van desenvolvese del 6 al 15 de mayu.

La Fábrica de Gas d’Uviéu acoyó hai poco la presentación de les I Xornaes de Patrimoniu Históricu Industrial entamaes polos conceyos d’Uviéu, Llangreu y Mieres cola collaboración de la Universidá d’Uviéu. Les I Xornaes de Patrimoniu Industrial van desenvolver del 6 al 15 de mayu y suponen una iniciativa pionera pa dar a conocer el patrimoniu históricu d’estos trés conceyos amestáu al so pasáu como grandes centros industriales de la rexón.

El marcu de presentación de les xornaes foi la Fábrica de Gas d’Uviéu como unu de los emblemes de la riqueza del patrimoniu industrial asturianu. Al actu de presentación allegaron los conceyales d’Urbanismu y Mediu Ambiente y de Cultura del Conceyu d’Uviéu, Ignacio Fernández del Pandorial y, Roberto Sánchez Ramos; Juan Antonio González Ponte, conceyal de Cultura, Empléu y Promoción económica del Conceyu de Mieres; Tamara Arguelles, conceyala de Cultura del Conceyu de Llangréu y el doctor n’Hestoria de la Universidá d’Uviéu, Rubén Vega.

Frutu de la collaboración ente los trés conceyos, la Universidá d’Uviéu y l’Arquivu de Fontes Orales pa la Hestoria Social d’Asturies (AFOHSA) surden estes Xornaes, un proyectu abiertu a la collaboración con distintes instituciones y asociaciones y con voluntá de continuidá nos próximos años.

Unu de los oxetivos d’esti programa ye valorizar, estudiar, caltener y, na midida de lo posible, poner n’usu’l patrimoniu industrial pal esfrute de la ciudadanía, partiendo de la premisa de que la riqueza industrial influyó y enforma na mentalidá y na realidá sociu-cultural de los trés conceyos, de la que configuró los sos paisaxes industriales que formen yá parte de la memoria colectiva y tán indefectiblemente xuníos a la identidá d’estos trés conceyos.

Esposiciones, teatru, meses redondes, talleres infantiles, ponencies o visites empuestes son dalgunes de les múltiples propuestes que’l programa de les I Xornaes de Patrimoniu industrial inclúi p’averase al heriedu del nuesu pasáu industrial dende diverses perspectives. Les actividaes programaes van desenvolver nos trés conceyos participantes y pretenden trazar una visión afecha y realista del estáu de caltenimientu y posibilidaes de recuperación y reactivación socioeconómica amestaes a esti patrimoniu. L’elencu de ponentes inclúi a arquiteutos, urbanistas ya historiadores que son referentes internacionales y van llegar a Asturies dende Francia, Alemaña, Barcelona o Madrid.

Dientro del programa d’actos inclúyese una visita empuesta a tres espacios singulares del patrimoniu históricu industrial: Bustiello (Mieres), Fábrica d’Armes de La Vega (Uviéu), Ecomuséu Mineru Valle de Samuño (Llangréu). Les places pa realizar esta visita son llindaes y van tramitase por rigorosu orde d’inscripción al traviés de la web de les xornaes http://www.jornadaspatrimonioindustrial.es/home ente’l 7 el 13 de mayu.