Uviéu invoca a los espíritus pa llograr el títulu de Capital Europea de la Cultura 2016

L’Ayuntamientu d’Uviéu aprovecha la fecha máxica del 23 de xunu, la nueche de San Xuan, pa, na Plaza de la Catedral y a partir de les once la nueche, facer un conxuru máxicu ya invocar el llogru del títulu de Capital Europea de la Cultura 2016. Ta programáu un espectáculu mitolóxicu, prender la foguera y baillar la Danza Prima alredor.

L’espectáculu va entamar coles muyeres de la Banda de Gaites Ciudá d’Uviéu. Depués va facese una escenificación que va contar cola collaboración del músicu llaniscu Xuacu Amieva y na que van participar bardos, magues, xanes, trasgos y el cuélebre. A medianueche va prendese la foguera y depués Xuacu Amieva y los sos acompañantes van entamar el ritual interpretando la pieza «El ríu Les Cabres». Soníos de la naturaleza, fumu y xuegos de lluces van dar pasu a cuatro magues, que van presentase contando lo que caúna va aportar a la ceremonia. Depués del conxuru, va baillase la Danza Prima, dirixida pol grupu La Hedra, de San Isteban (Uviéu), y va acabar l’actu con un conciertu de Xuacu Amieva y la so banda.

Amás, los establecimientos que formen parte de l’Asociación de Bares de Copes d’Uviéu van collaborar na iniciativa preparando una bébora máxico, de fórmula secreta, p’apoyar el conxuru, y que van sirvir esa nueche nel cascu vieyu a precios populares.