Uviéu habilita una APP pa detectar incidencies en zones verdes

Uviéu habilita una APP pa detectar incidencies en zones verdes
14 xineru 10:53 2019 Imprimir

La Conceyalía de Servicios Básicos, que dirixe la conceyala Ana Rivas, vieno acabante presentar un sistema de xestión informáticu que dexa al usuariu unviar datos, imaxes y allugamientu de desperfectos en parques y xardinos que precisen una intervención técnica.

El Conceyu d’Uviéu punxo en marcha hai poco un sistema de xestión d’incidencies ciudadanes de les zones verdes p’ameyorar el so caltenimientcu. La Conceyalía d’Infraestructures y Servicios Básicos, que dirixe la conceyala Ana Rivas, presentó esta mañana la nueva aplicación móvil ya informática, con un funcionamientu bien enciellu, que dexa a cualquier vecín del conceyu faiga llegar a la área de Parques y Xardinos les cuestiones que crea que riquen una intervención. La concejala esplicó que “va unos meses axudicóse’l nuevu contratu de caltenimientu de Parques y Xardinos. El Conceyu destina unos 5 millones d’euros al añu para caltener 20.000 árboles y 2,7 millones de metros cuadraos de zones verdes”.

L’APP puede instalase nel móvil o n’una tableta introduciendo na busca: “Uviéu incidencies Parques y Xardinos”, y tamién va poder utilizase dende un ordenador, na dirección https://oviedoincidenciasparquesyjardines.fccma.com. L’aplicación inclúi un perfil del usuariu y la posibilidá d’escoyer el tipu d’incidencia, l’elementu de xardinería, allugar por aciu GPS ónde s’atopa, esplicar de qué se trata, por casu si ye’l frayatu o cayida d’un árbol, estroces nun macizu de flores, argayos o carcavones en zona verde, etc. y unviar una fotografía.

Toles incidencies ciudadanes carguense nel Sistema de Xestión Informática del Serviciu al que tien accesu tantu’l Conceyu como la contrata. Al apaecer l’avisu en dicha plataforma va procedese, según precise de consulta previa al departamentu de Parques y Xardinos del Conceyu, al so resolvimientu.

Amás de l’aplicación informática, tamién podrán comunicase incidencies al traviés del teléfonu 902 103 358 y per corréu electrónicu: oviedoincidenciasparquesyjardinesfcc.es. L’oxetivu final ye ameyorar el serviciu y el caltenimientu de los parques y zones verdes cola collaboración de la ciudadanía.

  Categories: