Portada Conceyos Uviéu estrena 4 marches nórdiques pa destacar la ciudá como orixe del Camín de Santiago

Uviéu estrena 4 marches nórdiques pa destacar la ciudá como orixe del Camín de Santiago

by redacción asturnews

El Conceyu d’Uviéu, al traviés de la conceyalía de Deportes, estrenó’l sábadu, día 9 d’ochobre, una nueva ufierta de marches nórdiques pa reivindicar la importancia d’Uviéu como orixe del Camín de Santiago.

La primera de les rutes salió, esi mesmu día 9, de la plaza de la Catedral, a les 10 de la mañana y tien una duración averada de cuatro hores hasta llegar al altu del Escampleru. La conceyala de Deportes, Concepción Méndez, fio esti primer itinerariu, de dificultá fácil.

La segunda de les marches nórdiques va celebrase’l sábadu, 16 d’ochobre, con salida en bus del institutu uvieín Alfonso II, a les 9:30 hores. La etapa va incluyir el trazáu Altu del Escamplero-Grau. El plazu d’inscripción abre’l próximu llunes, 11 d’ochobre, a les 9:00 hores. L’itinerariu, tamién consideráu fácil, va tener una duración de trés hores y 45 minutos.

La tercera de les rutes, de bona dificultá, va desenvolvese’l sábadu 23 d’ochobre, dende Grau a Cornellana, con unes trés hores y media de duración. Nesti casu la salida, n’autobús, va ser a les 9.30 hores, dende l’institutu Alfonso II d’Uviéu. Les inscripciones abrirán el llunes, 18 d’ochobre, a les 09:00 hores.

La postrera de les marches nórdiques va celebrase’l sábadu, 30 d’ochobre, y va xunir Cornellana con Salas. Les inscripciones abrirán el llunes, 25 d’ochobre, a les 09:00 hores. Con dificultá moderada, l’itinerariu va cubrir n’unes cuatro hores.

Pa participar nestes marches nórdiques encamiéntase llevar una mochila d’unos 20 o 30  llitros, calzáu de trekking o botes de media caña, calcetos térmicos, camisetes de manga llarga y curtia, forru polar o chaqueta llixera, una gorra, pantalón de trekking o malla térmica, chubasquero, chalecu reflectante, toalla llixera, crema solar, gafes de sol, teléfonu móvil, botiquín básicu, documentación, botella d’agua o termu y avituallamiento. Amás encamiéntase dexar nel autobús una pequena mochila con daqué de ropa y calzáu de repuestu.

Tamién te podria gustar