Uviéu enllanta la gratuidá del bus urbanu

17 marzu 15:47 2020 Imprimir

Uviéu enllanta la gratuidá del bus urbanu y refuerza llínees para evitar andaes y garantizar el serviciu, amás d’amenorgar al 50 per cientu la flota de taxis y suspendre el pagu de la ordenanza reguladora d’aparcamientu (Zones Azul y Verde) mientres tea vixente l’estáu d’alarma.

El Conceyu d’Uviéu punxo en marcha una serie de midíes de contención frente al coronavirus COVID-19 nel tresporte públicu urbanu qu’entraron a valir a partir de la mañana de güei martes. Al envís de garantizar l’accesu de la ciudadanía a los puestos de trabayu, servicios básicos y centros sanitarios, adoptáronse una serie de midíes nel Serviciu Públicu de Tresporte Urbanu Colectivu imprescindibles para faer frente a la estrema escepcionalidá de l’actual crisis sanitaria, que trai la restricción de movimientos de les persones y, poro, la llimitación de movilidá.

Les midíes son les siguientes:

• L’horariu de los servicios que s’empresten nel Serviciu Públicu de Tresporte Urbanu Colectivu de Viaxeros caltiense igual que l’habitual de llunes a sábadu.
• Los servicios de domingos y festivos nun sufren variaciones.
• Van reforzase aquellos servicios que n’hores punta tán teniendo más arribación, por que sía posible caltener una distancia cimera a un metro ente viaxeros.
• Va instalase xuna zona d’esclusión dientro de cada autobús d’obligáu cumplimientu per parte de los viaxeros, de tala manera que’l conductor nun s’atope a menos de 1,5 m. de les persones que viaxen.
• Enllántase la gratuidá del autobús pa poder dar cumplimientu a lo indicao nel párrafu anterior sobro protección del conductor. Esto ye, les persones que vaiga utilizar el Serviciu van aportar al autobús de manera gratuita peles puertes central y/o trasera.
• Pa facilitar la ventilación del vehículu’l conductor va parar en toles paraes ensin necesidá de solicitú de la mesma per parte de les persones que viaxen.
• Nos vehículos del Serviciu de Tresporte Públicu d’Uviéu, siguirá aplicándose el protocolu de llimpieza y desinfección diaria establecíu’l pasáu vienres.

El Conceyu d’Uviéu recuerda la obligación de llindar los desplazamientos a centros de trabayu, sanitarios y realizar servicios de primera necesidá.