Portada Comunicación Uviéu da lluz verde a l’usu del asturianu nes oposiciones, na señalética y na toponimia

Uviéu da lluz verde a l’usu del asturianu nes oposiciones, na señalética y na toponimia

by redacción asturnews

La Xunta de Gobiernu celebrada esti vienres aprobó siete midíes empuestes a fomentar l’usu del asturianu nel conceyu y a apostar pola llingua asturiana “como patrimoniu social y cultural”.La propuesta parte de la Conceyalía d’Interior, dirixida por Iván Álvarez, y tien como oxetivu la normalización social de la llingua asturiana nel conceyu.

Ente les iniciatives plantegaes pola Conceyalía d’Interior, que dirixe Iván Álvarez, figura la rotulación billingüe progresiva, ensin distinciones topográfiques nuna y otra llingua, de les dependencies oficiales del conceyu lo mesmo que de les víes públiques del conceyu d’Uviéu con ‘Cai/cai’.  Amás, prevese la progresiva rotulación n’asturianu de tola maquinaria y vehículos de propiedá municipal que sían de nueva alquisición y establezse l’usu d’asturianu na indumentaria municipal.

Per otra parte, va facilitase al personal municipal l’asistencia a cursos de formación coles mires de faer cumplir la Llei d’Usu y Promoción na alministración local y va valorase la llingua asturiana nel ámbitu de les oposiciones y concursos convocaos pol Conceyu. Nesti sentíu, señálase qu’esta valoración va realizase cuando les característiques del puestu de trabayu y la naturaleza de les funciones a desenvolver asina lo riquiera, como nel casu del Serviciu o Oficina de Normalización Llingüística.

A lo último, establezse anovar y afaer progresivamente la rotulación toponímica de planos oficiales del Conceyu acorde col decretu correspondiente qu’apruebe la Xunta Asesora de Toponimia del Principáu d’Asturies.

Tamién te podria gustar