Uviéu contrata un estudiu sobro la realidá social de les persones mayores

Uviéu contrata un estudiu sobro la realidá social de les persones mayores
24 agostu 10:49 2018 Imprimir

La Xunta de Gobiernu d’Uviéu aprobó hai poco la contratación d’un estudiu de la realidá social de la persones mayores nel conceyu col que la Conceyalía d’Atención a les Persones ya Igualdá pretende disponer d’una conocencia detallada sobro la realidá de la población mayor de 65 años pa conocer les sos demandes y esmoliciones.

En palabres de Marisa Ponga, “l’avieyamientu de la población ye una de les cuestiones que más esmolez a la sociedá actual y ye ésta xuna realidá a la qu’el nuesu Equipu de Gobiernu nun ye ayena”.

El colectivu formáu por estes persones, afitáu de manera convencional y a efectos d’esti estudiu nes persones mayores de 65 años, algama nel conceyu la bien considerable cifra de 49.313 persones a 31 d’avientu de 2017, lo que representa casi xuna cuarta parte de la población total.

Los fondos cambeos qu’afecten a la sociedá proyéctense, bien especialmente, sobro estes persones, polo que resulta de munchu interés conocer cuáles son les necesidaes que perciben; cuál ye la conocencia de los recursos de la so redolada, cuálos son les sos moliciones, les sos suxerencies, en qué casos se pueden detectar situaciones de vulnerabilidá, etc. Trátase, a última hora, d’adquirir conocencia al traviés d’un estudiu sobro la realidá social que los afecta, pa poder adoptar, arriendes d’ello, les midíes organizativas pertinentes ya implementar programes y midíes acordes a les necesidaes detectaes.

La Xunta de Gobiernu aprobó tamién la prórroga añal pal agospiamientu d’emerxencia n’equipamientos residenciales allugaos nel conceyu d’Uviéu y el conveniu cola Cocina Económica p’anguaño, que xuben a una subvención de 100.000 euros que engloba tantu’l caltenimientu y funcionamientu de los comedores y el d’intervención urxente na dispensación de comida. Por aciu esti programa les families pueden allegar a la Cocina Económica pa recoyer la comida y llevala a les sos cases.