Uviéu celebra les II Xornaes de Patrimoniu Cultural

Uviéu celebra les II Xornaes de Patrimoniu Cultural
10 09:21 2016 Imprimir

Dende’l 15 al 19 de payares Uviéu va volver a celebrar les sos Xornaes de Patrimoniu Cultural col enfotu de alloñar del mundu más académicu y abrir al públicu polo xeneral.

Nesta segunda edición va cuntase cola collaboración de la conceyalía de Participación. El so responsable, la conceyala Ana Taboada sorrayó esta selmana que la cita programóse colos oxetivos de “recuperar lo público, dar valor a los nuesos espacios faciendo pedagoxía en cada acción, ampliar la idea de patrimoniu y xenerar llugares d’alcuentru ente persones claves na xestión del patrimoniu, entidaes ciudadanes y públicu polo xeneral”. Con base a estos valores, siguió esplicando la concejala, “construyóse un programa diversu, informativu, divulgativu ya inclusive creativu”.

L’historiador Toño Güerta, coordinador de les xornaes, foi l’encargáu de desglosar el programa que va entamar el martes, día 15, nel Teatru de Pumarín (18:00 hores) cola intervención de Fernando Millán y Gilberto Pedreira, responsables de la área de Cultura y Deportes de Madrid, que van falar del proxecto “Memoria de los barrios basáu na recuperación de la memoria colectiva de la ciudá al traviés de los sos vecinos y vecines. Una esperiencia que tamién se quier llevar a cabu n’Uviéu. Tres la so comparecencia, va emitise’l documental “Ventanielles. Memoria de nuesu barriu” y una mesa redonda na que van intervenir la directora del Arquivu Históricu d’Asturies, María Concepción Parés, l’archivera municipal, Ana María Herrero, y Sergio Palaciu de D-Espaciu Partycipa. Va moderalo un representante de l’asociación vecinal Fonte Pando –Pumarín.

Esta primer xornada va rematar con un alcuentru, bautizáu como “chigrecultura”, nel que va haber proyecciones y charres sobre esperiencies de participación ciudadana na recuperación de la memoria colectiva.

El miércoles, día 16, va realizase una visita al patrimoniu cultural de Olloniego cola historiadora Amaya Caunedo, tamién presente na rueda de prensa de presetación, col  oxetivu d’esplicar a los vecinos la hestoria de los llugares por onde pasen diariamente”.  Tres el percorríu, el centru social de Olloniego va acoyer la ponencia titulada “Olloniego. La llucha vecinal pol patrimoniu” de José Ramón Fernández, arquiteutu y autor del Plan Especial de Olloniego y Patricia Suárez, codirectora del Proyectu de Recuperación y Estudiu del castiellu de Tudela. Darréu van participar nuna mesa redonda al pie de María Fernanda Fernández, historiadora del Arte, Igancio del Pandorial, conceyal d’Urbanismu y Carmen Barbosa, presidenta de l’asociación vecinal de Olloniego. Nesta ocasión va moderar María Álvarez de l’asociación vecinal d’Olivares.

El xueves, 17 de payares, va celebrase ” Mapeu participativu: cola cabeza nes nubes”, una vuelta que va entamar y va rematar na Fábrica de Gas, nel  que se va percorrer al traviés de distintes dimensiones (arquitectónica, económica, natural y humana) el patrimoniu cultural de la ciudá. Amás nesta xornada podrá conocese la esperiencia d’Álvaro Bonet, de la plataforma Salvemos Cuatro Camino de Madrid y Diego Garulo, técnicu de la Fariñera de Zaragoza. Dambos van participar, xuntu al presidente de Tribuna Ciudadana, Alfonso Toribio, nuna mesa redonda que va moderar la vicealcaldesa, Ana Taboada. Tamién nesta xornada va haber sesión de “chigrecultura” cola emisión del documental “Memoria y futuru del nuesu Patrimoniu”, nel que se resumen la primer edición d’estes xornaes.

El vienres, día 18,  va desenvolvese la ruta “Hestoria de l´Alfareria de Faru” y podrá participase nuna clase maxistral d’alfarería gracies al artesanu Selito.  Darréu, Pablo López, responsable de La Ponte Ecomuséu va esplicar la esperiencia d’esti centru de Santo Adriano xestionáu polos vecinos.  Tamién va participar na mesa redonda que va completar el conceyal de Cultura, Roberto Sánchez Ramos y el xeógrafu y autor del Proyectu Museolóxicu del Centru d’Alfarería de Faru, Toño Güerta.

Les xornaes van rematar el sábadu, 19 de payares, con dos visita a la Fábrica d’Armes de la Vega, pa la que se precisa inscripción previa nel email: jornadaspatrimonioculturalgmail.com indicando nome, apellíos, númberu de teléfonu y DNI amás de la hora a la que quier realizase la ruta ( a les 12:30 o 15:00 hores). Pela tarde, va tener llugar la conferencia “Los Llaboratorios Ciudadanos. Un puntu d´alcuentru”  al cargu d’Antonio Lafuente, investigador del CSIC, que darréu va participar nuna mesa redonda al pie de Belén González d’Imaxina Un Bulevar y Ángel Nava de SOS Cultura.

De forma paralela va desenvolvese un concursu de pintura rápida’l sábadu 12 de payares na Fábrica d’Armes, pal que tamién se precisa inscribise primeramente nel email jornadaspatrimonioculturalgmail.com. Les obres presentaes van esponer na fábrica de La Vega por que los participantes nes rutes el sábadu 19 de payares puedan votales. El premiu ye un vale de material de pintura.

  Categories: