Uviéu celebra hasta’l 22 de setiembre la Selmana Europea de la Movilidá

El Día ensin coches va celebrase acutando’l tráficu na redolada del Campu San Francisco. El programa inclúi talleres y rutes en bicicletes, usos alternativos de places d’aparcamientu, charres y paseos de sensibilización.

L’área de Seguridá Ciudadana va completar esta ufierta con una campaña d’información pa los peatones nes zones y pasos de cebra más problemáticos de la ciudá.

La Selmana Europea de la Movilidá entamó’l vienres, 16 de setiembre, a les 17 hores, cola charra “Camudar la movilidá urbana, esperiencies”  al cargu d’Alfonso Sanz Alduá, miembru de GEA21, na see del Colexu Oficial d’Arquiteutos d’Asturies.  El sábadu, celebrose “El Día ensin coches”, acutándose la circulación de vehículos na redolada del Campu San Francisco. Y nesta xornada, hubo préstamu de bicicletes eléctriques y una “biciescuela”   al cargu d’Asturies Conbici.  El domingu, gracies a la collaboración d’este mesmu colectivu, celebrose un paséu en bicicleta poles cais d’Uviéu.
Les actividaes van siguir esti día 20 de setiembre, cola actividá “Ruralizar Uviéu” entamada pola Asociación Española de Coworking, na que se van amosar usos alternativos de les places d’aparcamientu en callar Arzobispu Guisasola, como xardinería, xuegos y música tradicionales, “Bicine” y arreglu de bicicletes.

Na xornada del día 21, la Policía Local y COCEMFE Asturies, van ufiertar de 11 a 12 hores, un paséu poles places d’aparcamientu accesibles. Esta iniciativa escuerre sensibilizar  a la población sobre l’usu solidario y respetuoso de les places reservaes a persones con diversidá móvil. El xueves, a les 19 hores, el catedráticu de Derechu Constitucional y miembru del colectivu Ciclojuristas, Francisco J.Bastida, va impartir nel Salón de Bodes del Conceyu d’Uviéu, la charra “Uviéu, ciudá abierta a la bicicleta. Presentación del Plan 360”. La Selmana Europea de la Movilidá cerrará’l  24 de setiembre con un taller de iniciación básica de bicicletes al cargu de TocBike, nel que se precisa inscripción previa.

A toa esta programación va sumase, tal que esplicó’l conceyal de Seguridá Ciudadana, Ricardo Fernández, “la reactivación  y intensificación del Plan de seguridá piatonal“, en que la so  primer fase los axentes de Seguridá Ciudadana y Tráficu  van poner en marcha “una campaña d’información y concienciación a los viandantes, principalmente a los neños y a los mayores de 65 años, nes zones y pasos de peatones más problemáticos” de la ciudá.  El plan va completar nun futuru con otros dos fases, nes que se va centrar l’atención en el conductores con controles de velocidá y alcoholemia, y nel estáu de les víes, respectivamente.