Uviéu aprueba’l primer reglamentu d’usu del tresporte públicu

La Xunta de Gobiernu dio lluz verde na so cabera sesión s’agostu al primer Reglamentu del Serviciu Públicu de Tresporte Colectivu Urbanu d’Uviéu. La conceyalía d’Infraestructures y Servicios Básicos, que dirixe Ana Rivas, ellaboró’l documentu que recueye los derechos y obligaciones de les persones qu’utilicen los autobuses municipales, según los de la empresa concesionaria y el mesmu Conceyu.

Tratase de la primer reglamentación integral pa un serviciu que cada añu usen más de 11,5 millones de viaxeros y viaxeres y qu’hasta agora solo cuntaba con un catálogu de deberes de malpenes dos folios aprobáu en 1998 como única normativa específica de referencia.

El reglamentu, qu’agora pasa a los grupos municipales pa un periodu d’enmiendes, darréu treslládase a Plenu pa so aprobación inicial y finalmente va ser espuestu n’información pública, p’allegamientos xenerales antes de la so aprobación definitiva. El mesmu recueye los derechos y obligaciones de tolos usuarios del serviciu y regula cuestiones cotidianes que pueden xenerar incidencies y hasta agora nun taben debidamente establecíes como l’accesu a los vehículos con menores, persones con dalgún tipu de discapacidá, carrinos infantiles, distintos bultos de mano, bicicletes, etc.

El documentu avanza sustancialmente na esixencia y promoción de lo relativo a l’accesibilidá universal  con cuenta d’ufiertar un serviciu apropiáu a cualquier persona usuaria potencial. Amás de garantizar la seguridá y prioridá de les persones con cualquier tipu de discapacidá, el reglamentu recueye que tanto nel moblame de les paraes como otros medios utilizaos pa la información sobro la rede de tresporte públicu urbanu, tales como página web o sistemes pa móviles, va promovese l’usu de medios que faciliten l’usu fayadizu del tresporte de manera que la información sía accesible a toles persones usuaries.
Dientro del apueste repitíu y firme del equipu de gobiernu por promover l’usu del tresporte públicu, el documentu establez la so prioridá dientro de les polítiques de movilidá pa lo que’l Conceyu va poder tomar les midíes fayadices rellacionaes cola prioridá semafórica al tresporte públicu, l’establecimientu de los carriles reservaos necesarios pa la circulación prioritaria o esclusiva del tresporte públicu, o cualesquier otra midida que considere conveniente de cuenta que garantice, na midida de lo posible, una velocidá comercial fayadiza, procurando ameyorar la calidá del serviciu.

Ente otres cuestiones, el reglamentu establez un catálogu de derechos y obligaciones pal personal de la empresa y los viaxeros y tamién les correspondientes sanciones en casu de faltes bien graves o graves. Cola fin de testar la opinión de los usuarios la empresa concesionaria va tener qu’establecer un sistema d’evaluación del prestu de les persones usuaries y presentar al Conceyu les propuestes necesaries pa la corrección cuantes incidencies, defectos o causes d’insatisfaición detéctense.