Portada Fiestes Uviéu “adulza” la FIDMA esti añu

Uviéu “adulza” la FIDMA esti añu

by redacción asturnews

La capital vuelve a la Feria d’Amueses, dempués de diez años, con un nuevu pastel creáu pa la ocasión, al igual qu’asocedió con “carbayones” hai agora un sieglu.

Uviéu va tar presente, dempués de diez años, na Feria Internacional d’Amueses d’Asturies de Xixón, con un stand qu’ocupa la mayor parte del Salón d’Asturies, xuntu al Palaciu de Congresos, a la entrada de la cortil ferial.

Los visitantes van ser recibíos por una esposición sobre’l Patrimoniu Mundial del conceyu d’Uviéu, y más concretamente sobre la ilesia prerrománica de Santuyano de los Praos: “Santullano desveláu”. L’amuesa recueye, ampliada, la que s’ufiertó nel patiu del RIDEA pa celebrar los 100 años del descubrimientu de les pintures del monumentu. En “Santullano desveláu”, comisariada por Natalia Díaz-Ordóñez, dibuxos, fotografíes y planos, testos esplicativos y retroproyección xunense p’amosar el gran valor d’una construcción qu’alluga’l conxuntu de pintura mural altomedieval más importante nel so tamañu de la Europa occidental.

Tres la esposición va haber una zona d’estancia, con bancos y onde la moqueta azul dexa pasu al verde artificial, como si se tratare del Campu San Francisco; na so redoma un puestu d’algodón d’azucre como’l que ta instaláu nel Paséu de los Álamos va regalar nubes azules y dulces a los visitantes. Al otru llau de la zona d’estancia, va haber una decena de puestos de confiteros, col lema que los unifica: “Uviéu adulza Xixón” .

Nestos puestos, con vienta al públicu, confiteros y una representación del Gremiu de Confiteros d’Asturies van ufiertar les sos especialidaes y ente elles, “carbayones”, el pastel que se creó n’Uviéu va un sieglu pa la Feria de Xixón. Agora, de nuevu, Uviéu va vender na FIDMA un nuevu pastel creáu pa esta ocasión pol Gremiu de Confiteros que va esibir tamién una pieza histórica, una refinadora de 1980. Nel stand, sobre’l mostrador d’información y atención al públicu, una pantalla xigante va emitir un videoclip de conceyu d’Uviéu.

Cada tarde de les fines de selmana, la redolada del stand d’Uviéu na FIDMA va cuntar con actuaciones de la Banda de Gaites Ciudad d’Uviéu.

Tamién te podria gustar