Uviéu acueye la Selmana de la ONCE dende’l llunes

La concejala d’Atención a les Persones, Marisa Ponga; el delegáu Territorial del ONCE n’Asturies, Pedro Ortiz Castillo, y la presidenta del Conseyu Territorial del ONCE, María Díaz Alonso presentaron en dependencies municipales, la Selmana del ONCE nel Principáu d’Asturies que tien llugar n’Uviéu del 27 al 31 de mayu.

La conceyala Marisa ponga estimó a la ONCE “l’escoyer estes dependencies municipales pa presentar estes actividaes” y destacó la importancia de la ONCE, “un valor seguro para ameyorar la calidá de vida de munches persones, un collaborador necesariu coles Alministraciones públiques”.

María Díaz destacó “que l’oxetivu ye tar na cai, que la xente sepa qué fai la ONCE y cuálos son los nuesos servicios y ferramientes”. Son cinco díes d’actividaes que van arrincar el llunes 27 de mayu, a les 20.00 hores, col coloquiu ‘Mesma manera de ver dende distintes cultures’ nel Club de prensa de La Nueva España.

Esti martes y el miércoles, nel Palaciu de Congresos, podrá visitase una esposición que va enseñar al visitante material específicu utilizáu poles persones ciegues na so vida diaria o na so formación y educación. Amás, podrá participase nun circuitu de movilidá nel que, quien lo deseyen, con un antifaz nos sos güeyos, van poder ponese na piel de les persones ciegues y enfrentase a les torgues que tien qu’evitar día ente día. Les visites van ser de 09.30 hores a 13.30 hores, para l’alumnáu de centros educativos y públicu polo xeneral. Estes actividaes van tener llugar na Sala de Cristal del Palaciu de Congresos.

El xueves, 30 de mayu, los perros de la ONCE van demostrar cómo se convierten en ferramientes qu’aumenten la seguridá y la independencia de les persones ciegues. La cita va ser a les 12.00 hores na plaza de la Escandalera y los asistentes van poder ver cómo s’adoma a estos animales y va informáse-yos de los derechos que tienen. El mesmu día a les 19.00 hores, va tener llugar la mesa redonda ‘Perros guía del ONCE’, na Biblioteca d’Asturies, na plaza Daoiz y Velarde.

El vienres, día 31, de 11.00 a 11.30 hores, ta programada la exhibición de goalball, deporte paralímpicu específicu pa persones ciegues, nel IES La Corredoria. Pela tarde, a les 19.00 hores l’Asociación Cultural de persones ciegues y deficientes visuales d’Asturies ‘Grupu La Esfera’ va representar la obra ‘Juleo y Rumieta’, na Biblioteca d’Asturies, en Daoiz y Verlarde.