Uviéu abre un procesu consultivu pa incorporar les idees y propuestes de los vecinos

La conceyalía de Participación Ciudadana abre un procesu consultivu pa incorporar les idees y propuestes de los vecinos a les polítiques sectoriales del Conceyu d’Uviéu, con cuestionarios, que van tar disponibles a partir de mañana, y mientres quince díes, en www.oviedodecide.es, van tratar sobro recoyida de borrafes, zones de baxes emisiones, comunidaes enerxétiques y rexeneración urbana de Ventanielles y Guillén Lafuerza.

El Segundu Teniente d’Alcalde y conceyal de Participación Ciudadana, Mario Arias, presentó esta selmana, xuntu al xefe de sección, Iván Toraño, el  procesu participativu que se va poner mañana en marcha al traviés de la web www.oviedodecide.es coles mires de percanciar “les idees y propuestes de los vecinos d’Uviéu que nos dexen realizar un diagnósticu sobro diverses  temes pa dempués desenvolver polítiques sectoriales nel nuesu conceyu”.  L’acción pon marcha al traviés de la área de Participación Ciudadana en collaboración con otros departamentos, como Servicios Básicos, Urbanismu y Mediu Ambiente y va ufiertar, mientres quince díes cuatro cuestionarios que van tratar sobro recoyida de borrafes; zones de baxes emisiones; comunidaes enerxétiques y l’área de rexeneración y renovación urbana de Ventanielles – Guillén Lafuerza. El conceyal esplicó que los trés primeros cuestionarios “van someter a la opinión de tolos ciudadanos empadronaos nel conceyu y la postrera solo a la de los vecinos d’esa zona, porque se trata d’unos barrios que tienen xunas característiques especiales que queremos someter a la so considerancia”.

Al traviés de la plataforma, “que se sometió a una reforma pa faela más clara y senciella”, los vecinos van poder rellenar “unos formularios curtios y ennciellos nos que se garantiza dafechu la protección de datos”. El Segundu Teniente d’Alcalde fixo fincapié en qu’esta acción participativa amuesa cómo la conceyalía “ta trabayando con seriedá y rigor” yá que “cuando llegamos al gobiernu atopamos con un departamentu que faía munches coses, pero que nun-y correspondíen. Les nueses prioridaes fueron ordenar la sección y apurrir, con meses d’adelantu, les subvenciones a los colectivos vecinales (con una dotación de 100.000 euros)”. El conceyal añedió que darréu se dar en actualizar el censu de voluntarios nel albergue d’animales, “y agora, damos un pasu más, implementando esti tipu d’acciones participatives, al traviés de consultes, que vamos siguir plantegando de forma socesiva”. Amás, “tamos trabayando nel cambéu de la Ordenanza Xeneral de Subvenciones, nel  anexu de Participación Ciudadana, por que’l  mayor númberu posible d’asociaciones puedan aportar a la Llínea B de subvenciones, dotada con 10.000 euros, con independencia de la fecha de la so constitución y yá empecipiemos tamién la tramitación del cambéu del Reglamentu Orgánicu de Gobiernu y Alministración (ROGA) pa estremar en dos el Distritu Urbanu 3”.

Según esplicó Ivan Toraño, tolos cuestionarios van garantizar la confidencialidad de los participantes. “Les resultancies van publicar na memoria del serviciu y de forma específica pa poder treslladala a los servicios promotores d’estes encuestes por qu’asina se desenvuelvan polítiques sectoriales qu’incorporen les propuestes vecinales”.