Portada Conceyos Uviéu abre la puerta a la collaboración cultural col Principáu

Uviéu abre la puerta a la collaboración cultural col Principáu

by redacción asturnews

L’alcalde d’Uviéu, Wenceslao López, dio por superáu’l vacíu creáu demientres los postreros 24 años de gobiernu local del PP tocantes a la collaboración en materia cultural ente la capital asturiana y el Gobiernu del Principáu.

L’alcalde faló esti día d’una situación que calificó de “inconcebible y anómala”, en calteniendo una xunta’l conseyeru d’Educación, Genaro Alonso, y col viceconseyeru de Cultura, Vicente Domínguez, a la qu’asistió tamién el conceyal del ramu na corporación uvieina, Roberto Sánchez Ramos.

L’aconceyamientu foi calificáu d’históricu porque “ye’l primeru que se da nun cuartu de sieglu ente un alcalde d’Uviéu y un conseyeru de Cultura porque la derecha creó un cercu de ciudá zarrada”, esplicó’l primer conceyal quien destacó que la cultura ye y hai de ser “una seña d’identidá d’Uviéu” y esi oxetivu va traducir en “una intensa collaboración col Principáu”.

El conceyal de Cultura, Roberto Sánchez, esplicó que’l planteamientu realizáu a los responsables culturales del Principáu centróse ye cuestiones “sensates” y “realizables”. Afitó ente les prioridaes pa dambes alministraciones la potenciación del Camín de Santiago y tamién les meyores necesaries nos monumentos prerrománicos.

Amás, Sánchez Ramos apuntó que solicitaren al Principáu un alcuerdu pa que en los distintos barrios puedan utilizase delles de los equipamientos de la conseyería como colexos o institutos pa desenvolver actividaes culturales fuera del horariu escolar. “Tamos falando d’ufiertar espacios a grupos de teatru o bandes musicales por qu’ensayen, por casu”, razonó’l conceyal.

Otra de les cuestiones concretes plantegaes a la Conseyería foi’l futuru de l’antigua ilesia de La Cadellada, allugada xuntu al nuevu HUCA y ensin usu relixosu dende va una década, coles mires de recuperar un espaciu p’actividaes del barriu de Teatinos y caltener el frescu de Paulino Vicente “La última cena”.

Tamién te podria gustar