Portada Conceyos Universitarios de tol mundu estudien el paisaxe del Oriente dende Corao

Universitarios de tol mundu estudien el paisaxe del Oriente dende Corao

by redacción asturnews
Corao: foto Nicolás Boullosa (https://www.flickr.com/photos/faircompanies/)

La localidá canguesa de Corao acueye estos díes la so particular universidá de branu, el IV Alcuentru Composición de Saberes sobro’l paisaxe del Oriente. Una ventena d’espertos y estudiantes de distintes universidaes del mundu participen nun alcuentru que pretende estudiar los tresformamientos nel paisaxe de la contorna y n’especial del Parque Nacional de los Picos d’Europa.

La idea pasa por entender cómo se planteguen los aspeutos d’intervención nel paisaxe, turismu y desenvolvimientu sostenible en trés casos d’estudiu. Per un sitiu, la crecedera urbana y les exes turístiques de Cangues d’Onís a La Vienta. Por otru, les aldegues y el paisaxe misto, patrimoniu y concentración parcelaria. Y a lo último, el Parque Nacional y el territoriu del Monte de Cuadonga. Pa les 18.30 hores del próximu vienres convocóse un actu públicu na Casa de Cultura canguesa pa presentar delles conclusiones preliminares sobro los casos d’estudiu ya idees pa realzar el paisaxe como patrimoniu de la contorna y sumalo a formes sostenibles de desenvolvimientu.

Esti alcuentru ta entamáu pola asociación Riolo Adientro, que promueve la Escuela de Pastores dende 2004 y agora ensaya estos otros modelos educativos pa formar a los profesionales de la mañana sensibles a la cuestión rural y a les particularidaes de los paisaxes de monte.

Tamién te podria gustar