Universal va estrenar les películes nos llares pol Covid-19

24 marzu 10:27 2020 Imprimir

Metanes les cancelaciones d’estrenos en cines -como Mulan o la nueva de James Bond- pola crisis sanitaria del COVID-19, Universal Studios decidió que d’equí p’arriba va estrenar les sos nueves producciones en sales de proyección y llares. D’esta miente, esti estudiu de Hollywood va saltase la práctica habitual de dexar un plazu de 90 díes desque una película llega a los cines hasta que puede vese en televisión, yá sía por aciu la so compra o arriendu al traviés de plataformes d’internet.

Amás de los títulos que va estrenar d’equí p’arriba, Universal tamién va faer dende esti vienres que tean disponibles los filmes qu’anguaño tien na cartelera de los cines: L’home invisible, La caza y Emma.

La decisión ye un cambéu de criteriu radical para los estudios de producción, que suelen aplicar midíes para animar a el espectadores a allegar a los cines para ver los sos estrenos na gran pantalla, antes de disponelos para’l so consumu en televisión.

Sicasí, colos cines zarraos en dellos de los países más importantes para la industria del entretenimientu como China, Xapón, Italia, Francia y España, amás d’en ciudaes d’EE.XX. como Nueva York y Los Ánxeles, el mundu del cine tuvo que camudar la so axenda de forma completa.

So l’alarma pol coronavirus y con numberoses sales de cine cerraes , esta fin de selmana la industria del entretenimientu rexistró xuna cayida del 60 % na so recaldación en taquilla, la mayor desque se tienen rexistros.

Con esi esbarrumbe, del 60,2 % al respective de la selmana anterior, los cines d’EE.XX. recaldaron 50 millones de dólares, la suma más baxa dende 1994, ensin cuntar la inflación y ensin conocer con exactitú los datos del restu del mercáu internacional, cuidao que más de 50 países acutaron l’asistencia a les proyecciones.

Según cifres de la Organización Mundial de la Salú (OMS), esta pandemia del COVID-19 yá dexa unos 6.000 muertos y más de 165.000 arimaos en tol mundu.

  Categories: