tornar al entamu

Uniovi podría tener el cursu que vien radio universitaria y emitir n’asturianu

Uniovi podría tener el cursu que vien radio universitaria y emitir n’asturianu

El candidatu al Rectoráu, Santiago García Granda, incluyía esti sábadu ente los sos compromisos electorales la incorporación de la Universidá d’Uviéu a la trentena d’instituciones españoles d’enseñanza cimera qu’ufierten a la comunidá una Radio Universitaria, cuntando cola posibilidá d’emisiones en llingua asturiana.

A partir de la propuesta d’un colectivu d’estudiantes que quieren crear una radio por y pa los estudiantes, onde sían ellos mesmos los que diseñen y dirixan los programes, siempres dende’l respetu y la responsabilidá, Santiago García Granda va poner en marcha col arranque del cursu un proyectu que yá cunta col sofitu de delles asociaciones de la Universidá, el Conseyu d’Estudiantes y alumnos de distintes facultaes. Un proyectu que cuntaría cola dirección de la institución universitaria pero facilitaría l’autoxestión de los estudiantes de los espacios reservaos pa un llabor creativu que munchos vienen demandando dende va tiempu y que, sigún fontes del equipu de la candidatura, tendría la llingua asturiana como protagonista de delles de les sos emisiones.

El proyectu malpenes precisa inversión, sigún los sos patrocinadores, y supondría emitir tantu per medios convencionales como per internet, daes les posibilidaes qu’ufierten los nuevos formatos d’emisión y podcasting. Aprovechar recursos infrautilizados ye otru de les exes del programa electoral de la Campaña de santiago García Granda y la Facultá de Formación del Profesoráu cunta con un estudiu de radiu, qu’usen en delles asignatures y que podría ser aprovecháu y potenciáu, en collaboración col Serviciu de Medios Audiovisuales del Milán, que sería otra pieza fundamental nel proyectu.

Na Universidá española atopamos anguaño con una tipoloxía bien variada d’emisores de radiu ente la trentena d’instituciones en qu’esisten emisiones radiofóniques. Dende les universidaes que pretenden que la so emisora de radiu sía’l llugar nel que los sos alumnos realicen les sos práctiques pa titulaciones como Comunicación Audiovisual o Periodismu, hasta les que les converten fundamentalmente en llugares d’espresión pa los alumnos, pasando por aquelles qu’intenten convertir el so mediu de comunicación nun centru d’investigación y esperimentación.

La Radio Universitaria de la Universidá d’Uviéu sería una integración de toes estes perspectives, incluyendo tamién tantu la potenciación del Minor de Comunicación qu’anguaño s’imparte nel Milán como l’aportación d’esperiencies docentes que sirvan al refuerzu del estudiu de conteníos apurríos pol profesoráu comenenciudu. La propuesta de xestión n’Uviéu pasa por un modelu integrador, onde tola comunidá universitaria pueda participar viviegamente.

Nel proyectu yá tienen confirmada la so collaboración delles asociaciones culturales, como Parpayuela de Mieres, y les cimeres radios alternatives y radios llibres d’Asturies como Radio Q.K. o Radio Kras, ente otres,.

Loading Facebook Comments ...