Portada Educación Uniovi meyora nel ranking de Shangái y yá ye una les 10 meyores d’España

Uniovi meyora nel ranking de Shangái y yá ye una les 10 meyores d’España

by redacción asturnews
Uniovi nel rankiong Shangai ARWU 2020

Uniovi meyora la so posición nel ranking de Shangái dende l’añu pasáu nel qu’entró per primera vegada nos años caberos nel top 500 del mundu y allugase amás ente les 10 meyores universidaes españoles nel ranking más importante del mundu.

El ranking ARWU (Academic Ranking World Universities) publicáu pola axencia independiente ShanghaiRanking Consultancy publicó esti sábadu, 15 d’agostu, la clasificación correspondiente al añu 2020, na que la Universidá d’Uviéu ta asitiada per segundu añu consecutivu ente les 500 meyores universidaes del mundu, una posición que llogró en 2003, añu en que foi publicáu per vegada primera esti ranking, pero que nun repitió hasta 2019.

El ranking ARWU utiliza seis indicadores oxetivos pa clasificar les universidaes del mundu, incluyida la cantidá de persones egresaes y personal docente ya investigador que ganara un premiu Nobel o una medaya Fields; la cantidá d’investigadores ya investigadores internacionales altamente citaos escoyíos por Clarivate Analytics; la cantidá d’artículos publicaos en revistes como Nature o Science; la cantidá d’artículos indexados o’l rendimientu per cápita d’una universidá. ARWU clasifica más de 1.800 universidaes cada añu, publicando les 1.000 meyores y destáquense les asitiaes ente les 500 meyores.

La Universidá d’Uviéu asitiase ente les diez meyores d’España, según esti indicador, y termina el cursu avanzando posiciones nos rankings académicos nacionales ya internacionales de referencia. La universidá asturiana meyora significativamente nel impactu de los y les sos investigadores, calteniendo un bon nivel nes contribuciones a Nature y Science y en númberu de publicaciones totales y xorreciendo nel númberu de publicaciones per profesor o profesora, lo cual indica una meyora nel rendimientu investigador de la institución.

Esta meyora produzse amás nun contestu de retayos nel financiamientu de la investigación a nivel nacional y rexonal, y con dificultaes pa la captación y retención del talentu, talamente como destaca la nota de prensa qu’espublizara esti sábadu la institución. Sicasí, la nota tamién apunta que “tanto la promoción y estabilización del profesoráu, como l’importante relevu xeneracional que se ta favoreciendo dende l’equipu de gobiernu, tán dexando caltener ya inclusive ameyorar el númberu y l’impactu de les publicaciones científiques en toles cañes de conocencia”.

Les midíes de incentivación de l’actividá investigadora y la recuperación del Plan de Promoción de la Investigación tán produciendo un efectu positivu na producción científica de la Universidá d’Uviéu, tanto nos Grupos Consolidaos como de los Grupos Emerxentes. L’aumentu de la contribución de los y les investigadores tanto junior como senior, d’altu impactu, indica l’afitamientu del lideralgu de los equipos d’investigación asturianos que cunten cada vez con mas investigadores de referencia. De la mesma, cabo destacar el llabor de la mocedá investiadora nes sos tesis doctorales, que nun se vieron suspendíes mientres la pandemia.

Tamién te podria gustar