Unidá Nacionalista Asturiana (UNA) pide que la TPA pueda vese en Galicia y la gallega en toa Asturies

Énte les informaciones qu’apaecen na prensa qu’indiquen que, énte l’inminente apagón analóxicu’l presidente de Galicia quier asegurar que nel occidente d’Asturies se pueda ver la TVG, el Portavoz Nacional d’UNA, Faustino Zapico, comentó la perplexidá de la organización “al ver que’l presidente de Galicia, cuestionáu polos sos ataques al idioma gallegu nel so territoriu vuelve sacar una pantasma vieya cola que quier probablemente esviar l’atención sobre la so política llingüística que vien de ser refugada inclusive pol Tribunal Supremu”.

UNA recuerda que’l debate llingüísticu nel occidente hai tiempu que quedó claru y que nin los habitantes de la zona del Navia-Eo nin el restu de los asturianos acepten nin van aceptar tuteles non solicitaes, inxerencies espansionistes o paternalismos culturales como los que se quixeren exercer nel pasáu. Zapico esixó por tanto a Feijóo que nun use Asturies como un argumentu nos debates políticos gallegos, darréu que la política llingüística n’Asturies solo correspuende a los asturianos y asturianes.

El portavoz d’UNA aprovechó pa criticar la política audiovisual del gobiernu asturianu, que “arrequexa y marxina la programación n’asturianu na TPA y que nun-y manda a los medios de comunicación públicos pa normalizar la llingua asturiana, amás d’escaecer dafechu la fala del Navia-Eo.” Zapico recordó que «dende UNA deféndese que la TPA tien que ser una televisión con una seña d’identidá que ye la emisión en llingua asturiana”.

Pa cabu Zapico afirmó que “dende UNA camentámonos que colos medios tecnolóxicos esistentes anguaño tolos asturianos y asturianes, non solo los del occidente, habríen poder recibir otres televisiones y familiarizase d’esta manera con otres llingües del estáu, al igual que los gallegos habríen poder recibir les emisiones de la TPA n’asturianu”.