Unidá Nacionalista Asturiana busca socios pa presentase a les elecciones de 2011

La Xunta Xeneral d’Unidá Nacionalista Asturiana (UNA), muérganu más importante de decisión de la organización ente congresos, aprobó por amplia mayoría la pasada fin de selmana entamar lo primero posible una ronda de contactos con colectivos sociales, partíos políticos y persones ensin vinculación partidaria pa estudiar “llinies estratéxiques de trabayu conxuntu y valorar la posibilidá de presentar llistes electorales en 2011”. La Xunta Executiva d’UNA, va ser la encargada de llevar alantre esta estratexa que pue xorrecer les selmanes qu’entren.

L’oxeticu d’esta iniciativa ye poner en marcha una dinámica de trabayu, qu’en cualesquier casu tendría de ser roblada pol Congresu d’UNA en febreru, que visualice en toa Asturies, y sobre manera nos conceyos, la esistencia d’un tercer espaciu políticu asturianu y verde, que represente una alternativa real a PSOE-IU per un llau y al PP per otru. Esta dinámica tendría de definise en caún de los casos, anque la voluntá d’UNA, según aprobó’l fin de selmana la so Xunta Xeneral, ye que “s’espeye tanto na collaboración na actividá política práctica diaria, como na ellaboración de les llistes electorales en 2011”.

L’ámbitu de contactos definíu pola Xunta Xeneral d’UNA, enmárcase nos colectivos, partíos y persones “nacionalistes, asturianistes, d’esquierda y ecoloxistes, siempre que’l so ámbitu d’actuación seya municipal o asturianu, ye dicir, que nun respuendan a intereses ayenos a Asturies”. Sicasi’l Congresu d’UNA de febreru va ser el que defina tanto la llinia política como les estratexes o les hipotétiques xuntances electorales.

Per otru llau, la Xunta Xeneral d’UNA aprobó asina mesmo’l Reglamentu del procesu que va llevar al Congresu que tendrá llugar el 27 y 28 de febreru de 2010, dando-y asina’l pistoletazu de salida al procesu precongresual. Una Comisión Organizadora, que quedó constituída esti fin de selmana, va ser la encargada d’organizar los alderiques precongresuales y el procesu d’ellaboración de les ponencies y les enmiendes a les mesmes.