Unidá califica de “vuelta a les cavernes” la eliminación de los estudios d’asturianu en Filoloxía

25 xunu 10:43 2008 Imprimir

Unidá Nacionalista Asturiana (UNA) califica de “vuelta a les cavernes” la eliminación de los estudios d’asturianu en Filoloxía nuna condena que fizo pública esti martes, a traviés de les declaraciones del so portavoz Faustino Zapico, lo que denominó “atracu a la sociedá asturiana”.

La Xunta Executiva d’UNIDÁ aconceyóse de forma urxente na tarde del martes pa valorar la votación na Facultá de Filoloxía na que se decidió eliminar los estudios d’asturianu y que provocó la dimisión de la decana de la facultá Ana Cano.

El so portavoz, Faustino Zapico, afirmó al respecto nuna nota de prensa unviada pela nueche que dende la federación nacionalista condénase “enérxicamente un fechu que supón una auténtica ofensiva troglodita que tien como oxetivu la eliminación ensin mázcares nin matices, de la llingua y la cultura asturiana a traviés d’una vuelta a les cavernes del neofranquismu españolista”.

El portavoz d’UNIDÁ afirmó amás que “ye gravísimo que’l votu de 34 persones que respuenden a intereses sectoriales y dacuando mercenarios, y en concreto de 2, Pedro Manuel Suárez y Félix Fernández de Castro, les dos persones que presentaron la propuesta, puedan roba-yos a los asturianos y asturianes la posibilidá de cursar estudios na so llingua y torguen la formación del profesoráu de llingua asturiana, y más cuando hai años la Xunta Xeneral nel so conxuntu pidió espresamente por unanimidá la implantación de los estudios de llingua asturiana na Facultá de Filoloxía”.

En cualquier casu dende la Xunta Executiva d’UNIDÁ, señalo Zapico, decidióse: 1.Amosar el apoyu y solidaridá con Ana Cano. 2.Facer un llamáu a la respuesta contundente de tolos sectores organizaos que se consideren defensores de la llingua énte esti verdaderu atracu a la sociedá asturiana nel so conxuntu. 3.Demandar una respuesta clara y rápida pela parte del nuevu equipurectoral, y en concreto del rector Vicente Gotor, que se comprometió na campaña a la defensa de los estudios de llingua asturiana. 4.Esixir d’una vegada la declaración d’oficialidá de la llingua asturianu, la única midida real que pue tornar la esistencia de fechos tan llaceriosos comos estos”.

  Categories:
Loading Facebook Comments ...