Unanimidá nel Plenu por qu’Uviéu siga siendo Ciudá Amiga de la Infancia

by redacción asturnews | febrero 6, 2020 11:41 am

La unanimidá nel Plenu por qu’Uviéu siga siendo Ciudá Amiga de la Infancia, sellu qu’otorga Unicef, foi l’apautamientu cimeru del primer plenu de febreru nel que tamién se fizo un fondu alderique sobro la masa salarial del personal llaboral del Conceyu d’Uviéu.

El plenu ordinariu del mes de febreru empezó esti martes guardando un minutu de silenciu, a pidimientu de Vox, en señal de duelu y repulsa pol asesinatu de la muyer, víctima de la violencia de xéneru, finada en Xixón. L’Alcalde tomó entós la palabra pa denunciar que “ante la imaxe que tamos dando nos plenos, onde l’insultu permanente poco ayuda, solicito que, ente toos, teamos al altor de la institución que representamos”. De siguío aprobáronse les actes de les sesiones anteriores.

El siguiente puntu foi l’alderique sobro la masa salarial del personal llaboral del Conceyu d’Uviéu (11.701.000 euros) y de la Fundación Municipal de Cultura (350.086 euros) pa 2020 . “Esti Conceyu tien faltes de personal bien importante por falta d’ufierta pública d’empléu y opta pola estratexa de ‘puertes de tras’. Hai más de 300 persones nesta última situación nel Consistoriu”, aseguró la vocera de Somos, Ana Taboada, que criticó “que el Directores xenerales que quieren instaurar agora nun sían funcionarios. Ye interesáu que nos enteráramos de nomes pola prensa. Entiendo que’l conceyal de Personal convoque les places de Recaldación, de la SOF… ¿o van refugar ustedes la so obligación? ”. Pol PSOE, Ricardo Fernández, fixo una serie de matizaciones: “esta masa referíase a tolos indefiníos y eso llévanos a dicir que la previsión qu’había en 2015 doblóse pasando de los 5,6 a los más de 12 millones d’euros”. Respondió-yos el conceyal de Personal, Mario Arias. El Teniente d’Alcalde aseguró que “la política de personal d’esti gobiernu pasa, evidentemente, por cumplir escrupulosamente la llegalidá”.

Na vez de réplica Ana Taboada indicó que “una cosa ye’l métodu y otra, la llegalidá. Nós nun despidimos a nengún trabayador de l’Auxiliar, taben nuna empresa privada”. Y, a manera de conclusión, Mario Arias recordó que “les profesionales de les Escueles Infantiles tán nos sos puestos porque asina comprometimos non como el trabayadores d’El Asturcón. Nós lo que queremos ye reforzar la plantiya”. Unanimidá del plenariu nesti puntu.

La baxa del  Conceyu d’Uviéu como miembru de plenu derechu de la Rede de Juderías d’España – Caminos Sefarad foi aldericada, a propuesta del conceyal de Turismu y Congresos, Alfredo García Quintana y sofitáu en comisión pol equipu de gobiernu. El conceyal aseguró que’l motivu ye l’impagu per parte del anterior mandatu de delles cuotes. “El Conceyu yera una de les sos  22 ciudaes dende 1998. Ye un exemplu más de la política sectaria porque’l tripartitu abandonó cualquier actividá con esta entidá despilfarrando 72.000 euros. Ante esta situación y ensin perxuiciu de considerar bien interesante’l so llabor y la vuelta d’Uviéu a esta entidá, vemos  obligaos a proponer esta baxa”. El conceyal anterior d’esta área, Rubén Rosón indicó que “nun esiste obligación dalguna pola que’l Conceyu tenga que dase de baxa. L’actual conceyal lo primero que fixo foi esaniciar la CometCon, qu’agora van esfrutar en Xixón; en segundu, mentir sobre la Navidá; convertir Fitur nuna escursión y agora salise de la Rede de Juderías. Los Conceyos nun pagaron les cuotes porque tán nun procesu de restructuración y si nun lu creen falen cola Rede. Salar por revanchismo y por el mesmu estatutu vamos tardar diez años en volver. Pidímos-y al conceyal de restoranes qu’Uviéu non se vaiga de la Rede”.

La Propuesta de la Conceyalía de Gobiernu de Polítiques Sociales d’empecipiar los trámites pa la renovación de la reconocencia de Unicef a Uviéu como Ciudá Amiga de la Infancia foi’l siguiente puntu del orde del día. Y  Somos presentó la única proposición  d’urxencia: “Caltener les beques de comedor, atención temprana y llibros, calteniendo los tramos” espunxo Ana Taboada (Somos). “Dean marcha tras a los retayos porque rectificar ye de sabios”.

El conceyal de Educación José Luis Costielles, por Ciudadanos, recordó que “el presupuestu yá foi aprobáu y tuvo espuestu p’allegamientos mientres 20 díes y curiosamente nengún grupu fixeron nenguna enmienda sobro la cuantía de les beques entendiendo por ello que taben d’alcuerdu porque tiempu tuvieron. Hai 3,7 millones pa beques más de 200.000 euros que los que realmente se gastaron l’añu anterior. Nós nun vamos destinar el dineru de les beques a otres conceyalíes distintes, nin a xubir los menúes, nin a pagar los conciertos de xente allegao. Presupuestemos más dineru”. La necesidá de la urxencia hai ablayáu tres votase dos vegaes por un empate na primera.

Source URL: http://asturnews.com/unanimida-nel-plenu-por-quuvieu-siga-siendo-ciuda-amiga-de-la-infancia/