Una ventena de casetes y diez actuaciones na primer edición de “Sabores de plaza en plaza” d’Avilés

La primer edición de “Sabores de plaza en plaza”, la ruta gastronómica que se celebra nes cais d’Avilés ente esti xueves 4 y el 7 d’agostu, va cuntar con una ventena de casetes partíes poles places d’Álvarez Acebal (5), Carlos Llobu (5), El Carbayedo (4), El Carbayo (2) y Rivero, na confluencia cola cai El Marqués (2).

La ufierta gastronómica va dir acompañada de música. En total, 10 actuaciones que van dir rotando polos escenarios que se van instalar en caúna de los cinco places. “Sabores de plaza en plaza” ye una nueva iniciativa turísticu-gastronómica que completa la programación festiva del mes d’agostu n’Avilés. Les 20 casetes van instalase al campu poles distintes places del Cascu Históricu y van ufiertar dos pinchos distintos caúna de 13 a 16 hores y de 20 a 23 hores.

El conceyal de Promoción de la Ciudá, Manuel Riola, considera qu’esta nueva propuesta d’ociu, “completa la programación festiva na ciudá y déxanos completar un mes d’agostu llenu de festivales y distintes iniciatives. Va meses que veníamos trabayando nesta posibilidá cola UCAYC y encaxa perbién nesta primer fin de selmana de’l mes d’agostu”. Campa punxo como referencia d’esti eventu los que se vienen celebrando nos últimos años en localidaes como Santander, Burgos o Valladolid con gran respaldu per parte del públicu.

El vicepresidente de UCAYC y responsable d’hostelería de l’asociación, Gonzalo Rodríguez, tamién destacó la potencialidá de la iniciativa, qu’esperen consolidar ya incorporar a la programación del mes d’agostu d’años socesivos, a la vista de la bona respuesta nesta primer edición.