Una tesis doctoral redactada y defendida n’asturianu consigue un «Sobresaliente cum laude»

Según informa l’Academia de la Llingua Asturiana, nel Departamentu de Filoloxía Española de la Universidá d’Uviéu, na Facultá de Filoloxía, diose llectura’l pasáu vienres, 16 de payares a les 12:00, a la tesis doctoral “La fala de Trubia: estudiu sincrónicu y diacrónicu, onomástica y aspectos sociollingüísticos”, redactada y defendida en llingua asturiana, y que llogró la calificación de «Sobresaliente cum laude».

El Tribunal, tuvo formáu pol Dr. D. José Ramón Fernández González como presidente, caderalgu de Filoloxía Románica (Universidá d’Uviéu), pol D. D. Miguel Ramos Corrada, profesor titular de Lliteratura Española (Universidá d’Uviéu) como secretariu y como vocales la Dra. Dña. Ma Jesús López Bobo, profesora titular de Llingua Española (Universidá d’Uviéu), Dra. Dña. Beatrice Schmidt, caderalga de Llingüística Iberorrománica (Universidá de Basilea-Suiza) y al Dra. Dña. Mercedes Brea, caderalga de Filoloxía Románica (Universidá de Santiago de Compostela).

El so autor ye Pablo Suárez García, Inxenieru Superior de Telecomunicación y Llicenciáu en Ciencies Matemátiques y, dende’l vienres, Doctor en Filoloxía. Pablo Suárez García trabaya actualmente pal Departamentu de Matemática Aplicada a les Tecnoloxíes de la Información (Grupu de Sistemes Intelixentes) de la Escuela Técnica Superior d’Inxenieros de Telecomunicación de la Universidá Politécnica de Madrid, y pal spin-off (de la Universidá Politécnica de Madrid) «Daedalus», empresa dedicada profesionalmente a la Inxeniería Llingüística. Imparte actualmente tamién los cursos de Llingua Asturiana del “Centru Asturianu de Madrid” y de la “Casa de Lleón”.

La tesis tuvo dirixida pola Dra. Ana Mª Cano González, caderalga de Filoloxía Románica de la Universidá d’Uviéu y foi codirector el Dr. Xosé Lluis García Arias, profesor titular de Llingua Española na Universidá d’Uviéu.

La tesis consiste nuna descripción detallada de la fala de Trubia, incluyendo les parroquies de Trubia, Udrión y Pintoria, na faza más occidental del conceyu d’Uviéu, dende los puntos de vista sincrónicu y diacrónicu. L’estudiu desendólcase al rodiu cuatro cuestiones fundamentales: 1) Estudiu sincrónicu completu, emplegando la metodoloxía propia del estructuralismu llingüísticu, de la fala trubieca actual. 2) Estudiu diacrónicu d’esta mesma fala; 3) Estudiu onomásticu de la fastera oxetu d’estudiu, cola compilación y estudiu etimolóxicu de la toponimia y antroponimia trubieques; 4) Estudiu de dellos comportamientos y creencies arraigaos na población trubieco con rellación a la so llingua, desde un puntu de vista sociollingüísticu.