Portada Educación Una tesis doctoral estudia la situación del asturianu nel Franquismu

Una tesis doctoral estudia la situación del asturianu nel Franquismu

by redacción asturnews

Una tesis doctoral qu’estudia la situación de la llingua asturiana nel Franquismu va ser lleida por so autor, el periodista y profesor Inaciu Galán, esti martes 21 de xineru, a partir de les 11 la mañana, na Universidá d’Uviéu.

El periodista y profesor Inaciu Galán va defender esti martes 21 de xineru a les 11 hores la so tesis, «La llingua asturiana nel Franquismu», un trabayu escritu íntegramente n’asturianu y que va presentase tamién énte’l tribunal nesti idioma.

La tesis apurre una imaxe global de la situación de la llingua asturiana nel periodu de la dictadura de Francisco Franco, faciendo un repás a la ideoloxía que’l franquismu construyó sobre la so idea d’España en rellación a les llingües del estáu y l’aplicación qu’ello tuvo na llexislación creada pa la xestión y represión d’esta realidá multillingüe.

Na tesis, que trabayó sobre fontes primaries y entrevistes, apaecen casos qu’ilustren la represión llingüística xeneralizada que se vivió nes escueles demientres el Franquismu. Ye tamién tema d’estudiu’l papel de del Instituto de Estudios Asturianos (IDEA), asina como la situación de la lliteratura escrita n’asturianu, mesmo n’Asturies que nel exiliu. Sobre la etapa última del Franquismu, la tesis fai una revisión del papel de l’asociación Amigos del Bable, fundada en 1969 y pieza clave pa entender l’apaición en 1974 del asturianismu modernu que supón Conceyu Bable.

Esti trabayu apurre interesantes novedaes pa la hestoria del idioma asturianu nun periodu que nun taba hasta agora estudiáu con fondura. Ente elles, la presencia del asturianu nes visites de Franco a Asturies, o la celebración d’una misa en llingua asturiana nel Palaciu del Pardo, en Madrid, con motivu de los cincuenta años del so matrimoniu cola asturiana Carmen Polo.

La llectura y defensa de la tesis de Galán, que dirixó’l profesor Xuan Carlos Busto, va tener llugar nun actu públicu que va celebrase nel Salón de Graos del Departamentu de Filoloxía Clásica y Románica, nel Campus del Milán d’Uviéu. El tribunal calificador va tar formáu por Ana María Cano ya Isabel Hevia Artime, de la Universidá d’Uviéu, como presidenta y secretaria respectivamente, y con Alberto Gómez Bautista (Universidade de Aveiro), Jaume Corbera Pou (Universitat de les Illes Balears) y Ramiro González Delgado, de la Universidá d’Estremadura, como vocales.

Tamién te podria gustar