Portada Educación UNA súmase a l’allegría pola decisión de la Xunta d’Escuela de Maxisteriu

UNA súmase a l’allegría pola decisión de la Xunta d’Escuela de Maxisteriu

by asturnet

La estaya d’educación d’Unidá Nacionalista Asturiana espresó esti martes el so “contentu pol resultáu algamáu na Escuela Universitaria de Maxisteriu”, afirmando que con esta votación la Universidá d’Uviéu “ta cumpliendo’l so llabor formador” en cuantes que “tien de responder a les necesidaes que se presenten nos centros educativos”. Sicasí llamenta qu’esti fechu nun fuera consideráu normal dende un entamu, faciendo falta una votación específica pa l’aprobación de la mención de llingua asturiana.

La UNA recuerda amás que “mal que-y pese a l’Alministración educativa asturiana l’alumnáu d’asturianu ye cada vuelta más numberosu, y esta situación desixe que l’asignatura seya impartida por un docente con un nivel de formación afayadizu”. La organización nacionalista felicita asina mesmo a toles persones que yá seya a nivel particular como colectivu, ficieron qu’esta propuesta saliera alantre, dende les persones que dieron el so votu positivu hasta organizaciones como la Xunta pola Defensa de la Llingua Asturiana.

Con too, la estaya d’educación d’Unidá Nacionalista asturiana afirma qu’esta ye la primer batalla de munches que queden por llibrar, “entamando pola creación de la especialidá de llingua asturiana que garantice un estatus llaboral xustu pa los sos docentes y siguiendo pola dotación de l’asigatura d’un espaciu razonable dientro del curriculum d’Educación Primaria, Secundaria y Bachilleratu, fuera del so calter optativu”.

Tamién te podria gustar